有「哈佛小甜甜」之稱嘅任葆琳（Pauline），同佢個日本男友拍拖都有一段日子，聽佢口風，佢都好有意思同呢個日本男友結婚。我小小So就八吓佢幾時結婚啦！點知佢話結婚就唔好講住，因為好多嘢都冇人知，就好似近排日本變成豬流感（H1N1甲型流感）嘅亞洲最大疫區，搞到佢同男友連見面都唔得，惟有兩地相思，真係好冇癮！
Pauline話佢之前都喺日本陪伴男友，上個月至返香港，原本打算今個月過去日本，點知依家豬流感咁嚴重，邊度都唔去得。本來佢想叫男友過嚟香港小敍一陣，然後一齊去台灣探媽咪，之後再返日本，但依家都唔敢叫男友過嚟，因為男友身處日本中部名古屋嘅愛知縣，都算幾近疫區，所以費事男友入香港境時麻煩，畀海關狂Check。
Pauline其實都好擔心男友，佢話男友做飲食業，日日要同人接觸，惟有日日打電話同男友談心，提佢要小心啲。而Pauline都好盡公民責任，話費事自己染病累街坊，所以決定等個疫情淡咗先飛去同男友見面，佢仲話：「幾時見到面，真係冇人知！」