本文重點
黃伊汶前晚錄影《美女廚房》，爆冷撼贏周氏姊妹，更獲得棒棒堂給滿分！周麗淇雖然廚藝麻麻，但依然獲小傑垂青，揚言會揀她做女友，認真冧爆！
黃伊汶、周麗淇（Niki）與周汶錡前晚為遊戲節目《美女廚房》擔任嘉賓，炮製「棺材板」與「芝士焗蠔」，台灣人氣組合棒棒堂擔任評判試食。錄影時，周汶錡比較雞手鴨腳，除了開不到爐火外，又將所有餸菜掃落地，被阿緯取笑入廚似打仗。當她將完成的焗蠔給觀眾試食時，一名女觀眾入口即轉身跑去洗手間，認真唔畀面！棒棒堂六子試食後亦劣評如潮，毫不留情地將所有食物吐出！反觀黃伊汶炮製焗蠔有板有眼，更即場示範拋鑊，難怪王子激讚她：「姐姐很厲害呀！」她所煮的焗蠔獲得全場滿分，認真犀利，事後她表示平日有煮蠔，反而沒有其他入廚經驗，自嘲夠晒好彩：「我淨係識煮蠔。（有冇入廚？）冇！一路都唔得，好彩今日開正我強項。（你覺得棒棒堂點呀？）佢哋好可愛，台灣男仔係比較可愛。（揀佢哋做男友？）如果我後生啲都可能會，但依家淨係欣賞。」
雖然Niki與家姐同樣廚藝麻麻，但獲得到小傑垂青，揚言三女之中會揀她做女友！事後她說：「佢哋仲話請我睇佢哋個演唱會！（小傑揀你做女友？）多謝晒！但有年齡差距，只當佢弟弟，等佢大個啲先。」
王子食完狂瀉
另外，棒棒堂昨日出席電台宣傳，由於小煜要返台準備大學考試，故只有五子上陣。阿緯與王子表示錄影《美女廚房》後一直肚瀉，問到有否為女友落廚？阿緯表示最叻炮製蛋炒飯，問他有否與女仔炒飯（台灣意指做愛）？他即一臉尷尬。
