全世界球迷等到頸都長、由巴塞隆拿對曼聯嘅歐聯決賽，今晚深夜2:45終於上演啦！大家準備好點樣迎接呢場大戰未呢？今日就由兩位唱得之「Son」，Eason陳奕迅同Jason陳柏宇同大家講吓佢哋嘅心水選擇啦！
陳奕迅：「作為一個『紅魔鬼』嘅支持者，我梗係貼佢哋會喺呢場決賽贏波冧莊。不過，對手巴塞隆拿亦大有來頭，兩隊實力接近下，打完90分鐘，再加埋時都係打成0:0一啲都唔出奇，當然最後射12碼分勝負，贏嘅會係曼聯，我估贏3:2啦！喺咁多紅魔球員當中，我最鍾意朗尼，佢有速度、有腦筋、有技術，兩條大髀仲要同我一樣咁粗，就知佢勁啦！睇啲咁重分量嘅直播，梗係成班朋友睇最過癮啦，一齊幫曼聯打氣，一入波就一齊Yeah！爽呀！」
陳柏宇：「我睇好巴塞隆拿可報去年一敗之仇，贏2:1捧盃！點解？咪因為呢支西甲勁旅，擁有好似美斯同亨利呢啲世界級前鋒囉！會同好多朋友一樣，都好鍾意阿根廷國腳美斯，佢腳法好、速度高，仲要咁後生，前途無可限量。之前睇波，我都會約埋幾個朋友，去晒其中一個嘅屋企，一邊睇波、一邊大食會，飲汽水、食燒雞翼就最正喇！