近日傳婚訊的Paris Hilton，日前出席康城電影節時獲邀參加遊艇派對，但她與男友Doug Reinhardt登船後公然激咀及企圖闢室尋歡，令船長大怒兼趕二人落船，認真瘀爆！
行為向來出位的Paris日前到康城出席大小場合時，巧遇艾頓莊老公大衞芬尼斯，並獲對方邀請到其友人的遊艇參加派對。Paris與男友Doug上船後便立即纏綿激吻，有在場賓客踢爆：「佢哋一上船就咀，佢仲咀到條脷伸到Doug個喉嚨，其他人係咁話佢哋行為不當，但Paris根本懶理其他人眼超超。」
情到濃時，Paris公然拖着男友到甲板低層的房間，準備闢室繼續鬼混，幸好大衞及時發現並加以阻止，船長得知後十分氣憤，並怒趕兩人落船，其他賓客均感謝船長，Paris今次認真瘀爆！
自爆愛真人騷
另外，Paris日前出席康城電影節，激讚參賽電影《Inglourious Basterds》好睇：「我一向鍾意拍真人騷多過拍戲，但我會為昆頓塔倫天奴而演戲，我想成為佢第二個紅人，好似《標殺令》嘅奧瑪花曼咁。」而日前Paris與莎朗史東等名人出席土耳其一間豪華酒店開幕活動，據聞瑪莉亞卡里及湯鍾斯收約1,170萬港元獻唱，認真和味。