呢排娛樂圈有唔少喜事，好似胡諾言結婚、姚嘉妮生BB，仲傳出bma一姐關心妍（Jade）同男友楊長智拉埋天窗，小小So日前出席飯局，同藝人吹開水就收到風話Jade已經落實婚期同地點，連姊妹、親友嘅機票都訂好，睇住Jade出道嘅小小So即刻打電話恭喜佢，點知佢好似有口難言咁話：「都唔知點講好，到時會通知同畀餅卡大家。」言談間，小小So Feel到Jade想將婚訊低調，不過佢承諾結婚一定會通知小小So，仲話會請小小So去飲，小小So都有叫Jade大方公布喜訊，不過佢堅持男友一日未求婚，一日都唔敢講出嚟！
小小So估計Jade遲遲唔肯公布，係因為同唱片公司仲有約，其實好多當紅歌手都突然宣布結婚，好似王菲、陳慧琳同周慧敏咁，又得到好多人祝福，所以Jade都唔需要過分擔心同保密，加上佢同記者關係好，應該得到好多行內人祝福，小小SoSo仲講笑話佢戀上富豪，可以過闊太生活，但Jade就澄清話男友唔係真係咁有錢，仲好抵死話：「今日有錢，但唔代表唔會有破產嘅一日。」嚇到小小SoSo叫佢(舌累)口水講過。