本文重點
周麗淇小姑獨處，已急不及待搶先為未來仔女爭取教育資助，成功獲伍詠薇哥哥Richard Eng答應贊助全部補習費用，而同場嘅靚靚同張智霖一樣唔執輸，第一時間為寶貝仔謀出路。
周麗淇（Niki）、周汶錡、張智霖同袁詠儀（靚靚）等人，前晚結伴出席《遵理補習社20周年晚會》，伍詠薇同哥哥Richard Eng以主人家身份滿場飛招呼朋友，伍姑娘話可以請到一班好朋友捧場，已經係送畀哥哥最好嘅禮物。
Niki同家姐周汶錡結伴亮相，佢話細細個已經知道呢間補習社，前晚捧場最主要係為自己同仔女鋪路，希望日後自己進修同仔女補習都有着落，Richard聞言即刻一口應承贊助Niki仔女所有補習費，氹到佢哈哈大笑：「好開心！估唔到咁都有贊助。」
張智霖照畀仔返學
Niki未出世嘅仔女都有贊助，張智霖同靚靚嘅精靈寶貝囝囝小魔童就梗係唔少得，Richard話如果佢哋嘅小朋友嚟補習，唔止唔收錢，仲一定有飯盒送兼倒貼錢添。張智霖話雖然近日豬流感（H1N1甲型流感）日趨嚴重，但照畀囝囝返學，唔擔心。