西班牙勁旅巴塞隆拿同英格蘭班霸曼聯，喺香港時間嚟緊星期四（5月28日）凌晨2:45，於意大利羅馬奧林匹高球場爭歐聯冠軍，全城哄動！無論係唔係球迷，都會攞呢場波嚟做熱門話題！不如今日就聽吓兩位人氣模特兒，諸葛梓岐同椋名凜對呢場大戰有咩睇法啦！
諸葛梓岐：「我會支持曼聯贏囉！因為呢隊波靚仔、型男球星特別多，最重要係我好鍾意『紅魔鬼』件波衫設計，無論係紅色定白色都好靚，我估佢哋會贏2:1。咁多個曼聯球星之中，我梗係最留意Ｃ朗拿度啦！佢個樣靚仔得嚟仲邪邪哋，又好波，仲要有超Fit嘅身形，自然多女Fans啦！我有諗過搵啲曼聯嘅擁躉一齊睇直播，成班人睇波開心啲之外，仲可以叫佢哋教我睇波。至於會唔會睇直播，就要睇吓嗰日有冇嘢做先，若果冇都會睇嘅。」
椋名凜：「雖然我唔係好識足球，但都知道今次爭歐聯冠軍嘅巴塞同曼聯都係好出名嘅球隊，個人覺得曼聯贏面高啲，或者會贏2:0啦！我知道好多女仔同我一樣，都會好欣賞既有型、又好球技嘅C朗拿度，無論喺香港定日本，佢都有好多支持者。我個人比較怕去人多嘅地方，所以如果睇直播都會選擇同朋友喺屋企睇，雖然無咁熱鬧，但人少少嘅感覺都唔錯㗎！決賽當日，我應該已返咗老家日本，所以到時好大機會同家人一齊睇，諗起都開心唷！」