本文重點
Angelababy與William（陳偉霆）傳出分手，Baby的經理人Kim大鬧報道扭曲事實！而一直以「好朋友」相稱的他們，近日被追問戀情時態度不如以往甜蜜，而「親生仔」（手錶）卻將出世，看來緣分未盡！
近日盛傳Angelababy與William情已逝，有指事業如日方中的Baby不欲戀情阻事業，因而斬斷情絲，此事更扯到Baby經理人Kim頭上，指Kim向Baby教路導致分手。昨日Kim接受電話訪問時直斥︰「扭曲事實嘅事我不予置評。（係咪你棒打鴛鴦？）扭曲事實，識我嘅人都知我係點。（你只准旗下模特兒識天王？）黐線！扭曲事實，Baby有好多朋友，唔理係咪天王，只要健康正派就得，佢啲朋友個個都好好，仲有我要澄清Baby從來冇同人住（同居）過，佢從來只係同家人父母住。（佢搬咗去貝沙灣？）梗係冇，佢係去搵朋友。（佢識咗有錢外籍男友？）有冇證據？（Baby依家有冇拍拖？）冇拍拖，佢拍拖嘅嘢我唔會回應。（你有冇為報道唔開心？）扭曲事實，不過多謝佢哋咁睇得起我。」
胡敏珊讚登對
雖然情路受阻，不過Baby與William事業卻相當暢旺，二人首次設計手錶，為胡敏珊的Chouette手錶Crossover，「親生仔」將於日內出世。昨日胡敏珊接受訪問時說︰「今次係佢哋第一次設計錶。（好似話佢哋兩個分咗手？）吓！我唔知佢哋拍過拖，我冇見過佢哋拖手，不過佢哋好襯，型男加靚女。」