自第三者介入後，顧美華妹妹顧麗華一度情緒不穩，08年12月15日更在家中打空針自殺獲救。不過，顧麗華再於5月2日在家中自縊身亡，顧美華十分傷心，昨日終開腔剖白獲悉胞妹自殺時的感覺，更大爆第三者種種不為人知的惡行！她昨日接受查小欣電台節目訪問時，表示妹妹顧麗華自殺對家人影響甚廣，年老的爸爸更因妹妹打空氣針自殺不遂，在三個月內暴瘦三四十磅，兼拒絕進食。她又透露妹妹與馮潮澤感情廿多來均十分要好，二人外出吃飯必定拖手，恩愛非常。她表示若不是第三者與馮潮澤公然出出入入，妹妹應會隻眼開隻眼閉。顧美華又表示妹妹雖曾有自殺前科，但其後表現積極，除定期睇精神科醫生及做義工充實自己外，更答應家人及朋友不再做傻事。
顧美華透露馮潮澤如此深愛第三者，是因為對方為他付出很多，甘願為他犯下墮胎彌天大罪！顧美華又表示馮潮澤十分信任第三者，更揚言對方有BB便會與她在一起。雖然如此，但顧麗華對第三者採取容忍態度，更一度有離婚打算，可惜悲劇還是發生了。
查：查小欣 顧：顧美華
查：5月2日你收到噩耗？
顧：（沉默良久）嗰日好似世界末日咁……我成個人好似畀人扯開咗，我覺得好內疚，我個妹其實係咪可以救得番㗎？我係咪做少咗啲嘢，做漏咗啲嘢？……我見到細嘅姨甥仔，佢一樣喊唔出，佢12歲咋，好可憐，佢目擊呢件事情（媽媽自殺）發生。
查：馮生呢？
顧：（語氣變得不屑）佢？佢應該好傷心啩！個老婆發生啲咁嘅事，20幾年，老婆喎！
查：有報道話馮生跪喺度喊？
顧：我冇感覺。
查：有冇幫妹妹執番啲嘢？
顧：（倒抽一口涼氣）第二日佢老公拎咗一本我妹妹嘅日記，依家喺我度，我睇咗知佢好多心聲，其實佢一路開始接受呢樣嘢，佢寫喺日記度話，今日聽到老公話呢個女仔又有咗！
第三者懷孕 妹妹願離婚
查：又有咗？
顧：佢話如果佢真係有咗係天意，我都準備去簽離婚，佢係接受(口架)！
查：第三次有咗？
顧：我哋知道係第三次，個男人又好得意㗎喎！如果個男人完全唔愛個老婆，咁咪離婚囉！我覺得冇問題。但個男人又話好愛呢個家庭，我諗個問題通常係睇第三者點做，如果第三者一定要做馮太，我諗我個妹都會讓位。
查：你睇到妹妹日記裏面，佢由12月打空針到佢走呢5個月內 ，有冇受刺激呢？
顧：佢喺日記度冇寫到呢啲嘢，佢喺20日火化， 喺19日嗰日設靈，當日好多朋友嚟，大家都話唔捨得佢。有對夫婦朋友，佢哋話原來我個妹曾經接過一個電話，(語氣變得咬牙切齒)係個第三者打畀佢話：『我今年生日最想收到嘅禮物係你死！』我當時唔知係嬲定乜，嗰個感覺係咪一個人可以諗得出嘅說話？之後我就問佢（妹妹）啲好朋友，你哋有冇聽聞過呢個女人，呢個第三者同我個妹通過話。佢哋話係有，話佢（第三者）係時不時都用電話騷擾佢。
頻被騷擾逼現身
查：你話第三者係大話精？
顧：對方話半年冇見過呢個男人，佢好似好無辜咁，我覺得佢講大話。醫生話我個妹可以減藥，點解5月2日會發生呢件事？佢老公同我講，（語氣又再咬牙切齒）話5月1日放假，佢兩公婆去睇戲跟住食晚飯，期間第三者不停打電話畀馮生，佢唔聽，跟住我個妹電話就響喇！佢不停咁打，打到之後呢個男人出去見佢。
查：馮生本來想同太太修好？
顧：佢自己咁講，咁我就好懷疑，既然你話同老婆關係修補中，點解呢個女人會打電話畀你，你又要去見佢？佢話呢個女人話依家冇乜Job做，你可唔可Support多我一陣。我話好簡單，唔使去見佢呀，佢個Version（版本）係食完晚飯後去見個女人，呢個係5月1日嘅事。跟住佢話佢返咗屋企，佢嗰晚個電話已經通宵不斷係咁震，到第二朝六點鐘， 呢個女人打到去屋企，工人聽完後叫咗呢個男人聽，呢個男人跟住又去咗佢屋企。然後個男人話畀我聽，話呢個第三者嗰晚打咗超過50個電話。
查：佢想點呢?
顧：一定要佢（馮生）出嚟見面咯！如果唔係踩上屋企見我個妹咁話喎！所以嗰個女人話佢半年冇見，何解半年冇見呀？
查：咁嗰晚究竟發生咩事?
顧：5月2日，呢個男人6點幾出咗去，佢話去打波，跟住我妹同啲朋友約咗去浴佛影咗相，我睇過兩張相，我都覺得佢係正常㗎！聽朋友講都冇乜異樣。浴佛後佢7點鐘佢去咗做Massage，之後佢買嘢食返咗屋企，10點鐘前都有幾個朋友收到佢Email，仲同人講笑添！但10點之後到佢出事嗰陣，中間我就唔知咩事，空白咗。有冇收過啲咩電話就真係唔知，係一個謎。
妹妹多計劃未想輕生
顧：點解呢個男人為咗自己開心，個第三者為咗佢自己嘅物質同金錢，去做啲咁傷害人嘅事？係咪做老婆只可以忍？佢忍唔到所以佢自己走咗咯，但佢剩番嘅傷痛係一世嘅，呢啲冇嘢可以彌補。點解佢（指妹妹）咁忍讓，佢哋都唔放過佢呢？其實可以唔會發生呢件慘劇，只要對方稍微喺我個妹立場度諗一諗，或者真係自己控制少少都唔會發生呢啲慘劇，我到今日都覺得件事唔係真既。其實佢哋屋企好多計劃，又去英國又去歐洲玩，阿妹五月頭又約咗朋友食飯，好明顯佢係冇諗到要自殺。
顧美華最後表示因事件令她太難過，故這次是她最後一次就妹妹自殺及「第三者」事件接受訪問及回應。
顧美華（56歲）
代表作：85年憑《似水流年》奪第4屆香港金像獎最佳新人獎；92年憑《浮世戀曲》，膺金馬影后；04年憑《美麗上海》摘下第七屆上海國際電影節金爵獎影后。
現 況：曾有兩段婚姻，與現任丈夫Andy Yen結婚十多年，幾年前她榮升外祖母。