本文重點
熱天又到，要找一處既消暑又好玩的地方，溜冰場確是一個不錯的選擇。很久沒有去溜冰的楊思琦，今趟再挑戰這項高難度運動，雖然技巧花式欠奉，但一向身材出眾的思琦，穿上緊身白色溜冰舞衣，大派冰淇淋！
楊思琦在《舞動奇跡》中表現出色，舞藝毋庸置疑，今趟轉戰到溜冰場，即裝備自己，穿上一件貼身白色閃片溜冰舞衣，思琦興奮地說：「以前睇柏安妮溜冰，覺得佢真係好靚，喺溜冰場上做跳躍、旋轉等動作好有速度感，動作又優美，令人非常羨慕！」
跪地凍僵膝蓋
思琦換上溜冰舞衣後，出眾的身材絕不比當年的溜冰公主柏安妮遜色，但其溜冰技術十分生硬，如果衝得太快即要扶着工作人員做「扶手」，她笑笑口解釋：「我已經好耐冇玩，讀中學時會同成班書友仔去溜冰，自己跌跌撞撞咗兩、三次就學識，冇人教㗎！不過到依家都冇乜進步過。（冇男友陪你玩咩？）冇呀！我哋以前好純，只同成班女仔玩，但見到其他學生哥有拖手仔，好似幾浪漫。」
除了行直線之外，思琦其餘所有花式都欠奉，她看到在附近練習的小朋友做後滑和旋轉等動作如履平地，即拉着身旁的訓練員嚷着要學，但這個速成班未能讓思琦如願以償，最後只能擺出靚靚Pose影相，其中一個單膝跪地的姿態，已令思琦吃不消！她說：「個冰面好凍呀！跪咗一陣已經僵晒。」為盡善盡美，思琦最後捱足分幾鐘，連膝蓋位也濕了一大片。