因貌似張栢芝而成功彈出的廣告女蔡穎恩（Evelyn），雖然仍在求學階段，但因外貌清純，除模特兒工作一浪接一浪外，連電影圈亦打她主意，前途無可限量。 文：專案組 攝：黎志輝
憑Canon及益力多電視廣告廣為人識的Evelyn，由於外貌似足張栢芝，加上感覺清純兼有少許日本少女味道，甫出道已成功彈出。談到過往拍攝的眾多廣告，她笑言最難忘的是兩部「招牌作」：「第一個最鍾意係Canon個廣告，雖然嗰日我化咗好淡妝，但估唔到拍出嚟嘅效果好好，望落真係成個日本妹咁。而且拍嗰日仲有隻柴犬陪住我，佢係就係好得意，不過衰在成日扭計，要氹好耐先至肯合作。」
至於另一部招牌作益力多廣告，Evelyn則覺得很新鮮：「呢個係我第一次拍廣告要用故事形式拍，仲要同男主角嗌交添！最難係要眼泛淚光，所以都要拍成四、五次先過關，好彩個效果出嚟都幾搞笑！」
等時機做形象設計師
現修讀時裝設計的Evelyn，年紀輕輕已備受注目，但慶幸的是她在校園中沒有被排擠，人緣還十分好：「因為我要拍戲又要做模特兒，所以成日都要走堂，好彩啲同學都好接受我，仲鼓勵我添！」她更懂事地表示明白「花無百日紅」，尤其模特兒的生涯更是短暫：「呢行好難做成世，我入行主要係想識吓唔同品牌嘅公關，等第時大啲機會可以做到形象設計師。」野心勃勃的Evelyn最近還踩過界拍電影，誓要與Janice Man及Kama等看齊：「咁又唔好咁講，我之前喺學校都有讀戲劇，都係想乜都試吓啫！」
Profile
姓 名：蔡穎恩（Evelyn Choi）
年 齡：19歲
身 高：5呎3吋半
三 圍：33B、25、35
曾參與廣告：益力多電視廣告、Canon電視及平面廣告、迪士尼《雪亮聖誕》電視廣告