近日有雜誌爆男藝人尋歡，蔡卓妍（阿Sa）力撐緋聞男友鄭中基，但強調不能容忍男友偷食：「如果係就飛得！」
阿Sa、曾志偉及錢嘉樂前晚為《櫻桃小丸子之灰姑娘音樂劇》配音，近日有雜誌匿名爆藝人尋歡，當中涉及幾名男藝人，更指其一男藝人房中貼滿藝人女友照片！一臉倦容的阿Sa，被問到有否送照片給鄭中基（Ronald）時，她說：「黐線！（合照？）冇！如果堅料不如開名講！最唔鍾意呢啲報道，好影響其他人！（信得過Ronald？）唔答呢啲！」她表示當日有記者不說上文下理問問題，令她不知說甚麼：「呢個時勢，有證有據點解唔登？（影過你同Ronald睇戲？）觀眾諗！」她斷言不會接受另一半尋歡：「如果係就飛得啦！接受唔到，亦唔會呃到我！」
錢嘉樂正途交女友
至於嘉樂聽到尋歡事件後反應甚大，他說：「咁犀利？不過唔係我！」志偉說：「咁嘅大話都講得出！」嘉樂解釋現時只會約好友摸酒杯底，不過當年做武師時曾見識過：「依家會從正途結交女友拍拖囉！」志偉則說：「扮乖仔先係（壞），唔係出夜街嗰啲！」
另外，方力申昨日出席《大藍鯨啟動儀式》時，口快快將「Project」說成「仆直」，但仍死撐說：「搞吓氣氛啫！」對於志偉指扮正經的男人去滾，他說：「我唔係扮正經，係真正經！」對於男藝人涉尋歡事件，他說：「我唔信！（鄭中基帶你去蒲？）有，有時錄影完去打邊爐！（即係『滾』？）你都幾幽默！」
文：音樂組
攝：謝國華