周家蔚自參加《舞動奇跡》後，個個都知道佢係好舞之人，就連周志坤老師都對她寵愛有加，讚不絕口。不過，小小So有日讚佢時，家蔚話自己原來唱歌都好掂，成日同班姊妹唱K添！
小小So ：呢排出席活動成日跳舞，都幫到手搵到唔少真銀？
周家蔚 ：都OK，不過我唔止跳舞，唱歌都得㗎！以前細細個已經好鍾意唱歌，喺加拿大已經跟老師學，仲參加過比賽，攞咗個最有潛質獎。
小小So ：唔怪得天明成日都帶埋你一齊出席啲好友派對啦！你又唱得又跳得。
周家蔚 ：唔係，反而啲Friend就成日搵我去唱K，佢哋一有時間就去，我依家入咗行都少咗。
小小So ：你咁鍾意唱歌，啲Friend唔怕你「爭咪」？
周家蔚 ：搵我去就係有呢度好，因為我把聲唔夠響，合唱時把聲唔多覺，依家我通常同佢哋唱和音，佢哋不知幾鍾意呀！