本文重點
農夫的陸永Rap得又唱得，最近更踩界做埋名嘴，以個人名義搞獨腳棟篤笑，歡迎觀眾咬蔗、掟蕉盡情玩，他更透露屆時會毫不留情將老闆陳冠希（Edison）的「合照事件」擺上舞台，實行要豁出去。
陸永誓言要挑戰自己口才，計劃於7月10至11日大搞名為《和記寬頻潮捧：陸永棟篤撐之我係明「升呢」》的Talk騷，沒有好拍檔C君在身邊唱雙簧，陸永坦言感到壓力，他說：「今次台上得自己一個，一定會驚、會擔心，平時會有C君互動吓，今次壓力會好大、好辛苦，希望會成功啦！」
擇吉日賣飛
陸永特別選址新光戲院做騷，又邀請喜劇大師詹瑞文做「明燈」，以及麥玲玲師傅為他擇吉日賣飛，他說：「真係人算不如天算，麥師傅算出嚟當日係公眾假期，唔可以公開賣飛，不過我揀新光戲院係因為夠晒草根，大家可以咬住蔗睇騷，唔滿意可以掟蕉，夠晒互動。」
問到陸永會否講及老闆Edison的「床照事件」，他笑說：「會，梗係講啦！呢個係最值得講嘅嘢！不過我係講『合照』事件，咁耐以嚟大家嘅合照囉！遲吓會打畀佢同佢傾傾。」