最近SoSo姐為咗好朋友生日，要諗送乜嘢生日禮物而頭痛，好擔心送出嘅禮物又唔啱使，對方唔好意思話唔鍾意，又勉為其難收咗，真係又尷尬又嘥錢。不過如果SoSo姐嘅好友係吳建豪（Vanness）就好，話說Vanness雖然8月至生日，但佢成日周圍飛，難得嚟香港宣傳，所以佢班香港朋友就提早幫佢搞生日會，其中一位女仔朋友仲送咗部最新款嘅手機畀佢，咪以為送最潮嘅禮物畀自命潮爆嘅Vanness就啱晒，原來佢係唔啱用喎！
Vanness口口聲聲話部電話某啲裝置唔啱使，不過SoSo姐知道，因為太高科技，佢根本唔識用！結果玩咗一日就放棄，可憐呢位朋友以為Vanness一定愛不釋手，如意算盤打唔響，潮機竟然唔啱使。不過Vanness夠慳家，並冇將部電話丟埋一邊，反而厚住面皮，專程攞去旺角搵收買佬出售，雖然佢喺外國長大，但佢對香港買賣二手電器行情瞭如指掌，唔單止高價賣出朋友送畀佢嘅潮爆手機，仲將賣出嘅錢轉買心頭好，係一部最潮數碼相機G10。SoSo姐真係佩服，Vanness呢個行為非常環保！