昨晚路易威登LV舉行《路易威登：創意情感》藝術展開幕酒會，大會請來品牌主席Yves Carelle、LVMH集團主席Bernard Arnault、藝術總監Marc Jacobs、村上隆、Richard Prince、張曼玉、何鴻燊與四太、琦琦及周汶錡等出席！晚上七時許，Maggie與男友Ole Scheeren十指緊扣到場，現場約百名記者一擁而上，Maggie心情大靚，被問到身體怎樣？她說：「好番晒，冇事喇！（之前自我隔離？）有少少感冒，唔想出街傳染人，所以自我隔離四、五日！其實起初都有啲驚，我一落機覺得有少少唔妥，已經即刻去睇醫生，仲做埋檢查，好在話冇事；去唔到台灣都覺得唔好意思，下次補番數，不過我覺得個決定係啱，好過去到唔知係唔係（豬流感）。」
當識個朋友
問到由昆頓塔倫天奴執導、她有份與畢彼特合演的戰爭片《Inglourious Basterds》中的戲份被全部刪除，Maggie淡然地說：「呢啲情況成日都見，不過之前我係主角，戲份多啲，所以Cut極都有。（失望？）昆頓喺康城已經打畀我，同我講啲戲份Cut晒，當時我就答『吓！係咩！』其實我都唔係好介意，一切以電影為先，如果因為我嘅戲份放咗喺部戲入面而唔好睇，我都唔想。今次自己都係當玩吓，識個朋友，我哋今次合作得好開心！」
爭取時間拍拖
問她與畢彼特有沒有對手戲，Maggie即如含羞少女般說：「好彩同佢冇對手戲，如果唔係就差啲！（再同昆頓合作？）佢喺康城好忙冇講，之後大家約出嚟飲嘢再傾啦！依家拍戲都係隨緣，每日都有唔同嘅事發生，我又唔係退休！」
至於經常與男友形影不離，是否已開花結果？她表示感情事很難說，男友還未求婚，暫沒有結婚打算，記者笑言兩人經常在一起？她說：「唔係完全唔分開，一定要，不過要互相遷就同度期，我哋的確好多時間喺埋一齊。（係咪為男朋友放棄接Job？）唔係，不過如果樣樣嘢都做，就對段感情唔健康！」