黑猩猩睇片學識生火煮食
【本報訊】美國艾奧瓦州一隻黑猩猩，懂得用打火機和火柴來生火、用煎鍋煮食、小心淋熄火種，行為似足早期人類。飼養員指牠模仿能力驚人，反映猩猩潛能深不見底。
猩猩專家薩維奇朗博博士飼養八隻侏儒黑猩猩（Bonobo），三十一歲坎茲（Kanzi）最醒目又熱愛模仿，牠最愛看一齣講述早期人類生火的電影，看了數百次，又被飼養員用營火煮食吸引，現時已能自己煮食。
薩維奇朗博博士教坎茲劃火柴，牠不僅學得快，持火柴的手勢更似足人類。坎茲懂砌火堆，加樹枝以保持火種。享受BBQ之餘，坎茲亦會揸鑊鏟用煎鍋煮漢堡肉。
侏儒黑猩猩的DNA與人類有九成九一樣，牠們同樣愛賭。德國研究發現，侏儒黑猩猩等猿猴類動物會賭博，實驗中牠們逾半時間會揀博一鋪，以求獲取更多香蕉。