索女陪瞓 宅男排隊幫襯

號稱全球第一間嘅「陪睡店」，最近喺日本嘅宅男天堂秋葉原開業。該店嚴格規定客人跟索女只能一起睡覺，絕對不允許有越軌行為，聽落好似好齋，但係店舖一開張，就令無數宅男趨之若鶩。

據知呢班索女除咗陪瞓之外，仲提供各種服務，不過大部分都不含色情成分，反而務求令客人有特別感覺為主，不過每項服務都要額外收費，價格絕不便宜。

愈打愈興奮

其中有一項服務的確好令人匪夷所思，就係客人可以要求囡囡打自己兩巴，事關客人大多數係宅男，平時冇女人會重視佢哋，所以覺得畀女人打兩巴掌，都係重視同愛嘅表現，正所謂「打者愛也」，所以通常客人都唔止要求囡囡打自己兩巴咁少。至於收費方面，每兩巴一千日圓，條數認真乸脷，隨時未瞓覺已經使咗幾千日圓，仲貴過去搵浴花。

增值服務多

另外，同囡囡深情對望，每分鐘收費一千日圓，有幫襯過嘅客人表示，由於囡囡太索，不知不覺對望咗超過十分鐘，結果埋單時相當肉赤。至於其他「增值」服務包括有囡囡跟客人十指緊扣談心，以及客人瞓喺囡囡大髀等。想再親密一啲，好似擁抱、接吻等亦冇問題，不過價格就會三級跳，真係好識賺錢。不過唔少客人都認為最緊要玩得開心，花費多少並唔係問題。