世界波：吸血調情Vampire Sex

下個月好多男士都會發噩夢，因為羅拔仔套《吸血新世紀》將會上映最終章，到時女伴見到羅拔仔呢隻吸血殭屍出場，肯定會不停大叫：「嘩！好靚仔呀！」然後逼你入場睇完一次又一次。想制止女友呢種行為，不妨試試同佢玩吓殭屍性愛遊戲，等佢從此只會冧你呢隻鹹濕殭屍。

雖然羅拔仔因為太有型而成為男人公敵，不過佢喺戲中嘅浪漫行徑大有學習之處，此外一套源自吸血殭屍嘅性技亦同樣可以幫大家改善性生活。兩性關係專家Ian Kerner博士更透過研究吸血殭屍特性同行徑，配合現代科學理論，再加上豐富創意同幻想，領悟出一套吸血殭屍性愛寶鑑。

一點燭光

人可以有雙重性格，燃點蠟燭亦可以帶出兩種不同感覺，例如食飯嘅時候，喺餐枱點番幾支蠟燭，感覺真係浪漫到死。但係，當大家入到一間疑似有吸血殭屍嘅古堡，只係見到牆壁上嘅蠟燭被風吹到幾乎要熄，感覺會既神秘又惶恐。想玩殭屍性愛玩得更有Feel，大家可以嘗試喺房間熄晒燈，燃點蠟燭，營造神秘刺激嘅感覺，女友一定Buy！

黑色斗篷

好多荷里活殭屍電影入面，都會提及被稱為吸血殭屍始祖嘅德古拉，佢嘅特徵除咗有蠟到好似賭神一樣嘅騎樓髮型以及雪咁白嘅面色之外，仲有一件長到拖晒地嘅黑色企領斗篷。男士如果可以買一件，入面乜都唔着，同女伴埋牙之前至打開斗篷，露出雄風，女伴一定會覺得好驚喜。如果冇斗篷的話，亦可以試用黑色大褸代替，當然效果會差少少啦！

頸部刺激

傳說中嘅吸血殭屍唔食人類嘅食物，其營養來源只係靠吸血。如果要吸得盡情暢快，通常殭屍都會咬獵物嘅頸部，因為此乃大動脈所在之處。而進行吸血殭屍式性技，大家亦可以針對女伴嘅頸部作刺激，可以吻、可以舔，亦可以用指甲輕抓，增加痛快感覺。

輕咬肌膚

吸血殭屍戰鬥力極強，除咗因為力大無窮，仲識多種不同變化，除咗識得飛之外，把口亦一樣強勁，可以咬人吸血，同時又可以令獵物變成同類。不過我哋人類都唔輸蝕，上床嘅時候一樣可以活用口技，而為咗令刺激性增強，亦可以用牙輕咬對方嘅肌膚，若然輕咬女伴嘅乳尖再輕力廝磨，女方肯定會High到驚呼狂叫。

扯爛衣衫

人類面對困境時一定會極力反抗，見到吸血殭屍追住自己嚟咬，就算係弱質女流都會變到史泰龍咁威猛。所以，唔少電影當中嘅吸血殭屍都要同目標女子角力一番，過程中往往扯到對方衫都爛晒。為咗增加床上刺激，以模仿殭屍扯爛女角件衫嘅一幕，不妨事先同女伴商量好，叫佢換套舊衫畀你扯，爛咗都唔會肉痛嘛！