世界波：閨房不樂誰偷走了我的性趣？

愉快嘅閨房之樂好多人都想享受到，之不過好多人卻對床事有所忽略，搞到同伴侶未曾亂性已敗性。點樣先可以令床伴保持良好性趣？正所謂：「工欲善其事，必先利其器。」要做一個有情趣嘅伴侶，男士們有幾方面一定要注意，除咗要保持儀容整潔衞生，床戰之前亦要做好準備工夫。乜唔係一入房就剝光豬激戰最刺激咩？男人的確會咁諗，不過女士們就絕對唔認同噃！

女人嘅心情變得快過天氣，而且性趣仲好易受到外界影響，男人面對佢哋就好似如履薄冰，萬一遇着女伴心情欠佳，晚上必然飽受乾煎蝦碌之苦。是以如果拖住女伴剛踏入房間，對方就已經有掉頭走嘅意圖，切忌怪責對方，因為好多時都係男方做得唔好，因而令其性趣被偷走，咁偷走女人性趣嘅又係邊個呢？

一片凌亂

男人一般都甚少理會瑣碎事，所以好多男人嘅睡房都好似狗竇咁亂。有兄弟會話：「張床仲瞓得咪得囉！」不過大部分女人都習慣身處乾淨環境，一旦入到男人凌亂一片嘅客廳或房間，必然感到不安或厭惡，想佢哋瞓低陪你曳曳？執好間屋先啦！

浪漫無罪

同女士交歡，唔應該一嚟就趕住入正題，一定要有前戲先可以令女伴心情愉悅，交歡時先會玩得更加開心。不過呢度所指嘅前戲唔係指攬攬錫錫同愛撫喎，而係食一頓燭光晚餐又或坐低睇番齣愛情片，大家四目交投，眉目傳情，自然容易撻着慾火，咪一見面就想做愛咁唔浪漫啦！

經濟壓力

所謂貧賤夫妻百事哀，經濟差唔單止影響到日常生活，性學專家Lombardo博士表示，經濟仲會影響性趣。博士話處理過好多性趣欠佳嘅求助個案，問題都同擔心經濟前景有關：擔心冇錢用、擔心冇咗份工，呢啲憂慮都會令性趣大減，唔怪得咁多男人就算窮過蒙正，溝女嘅時候都要充闊佬啦！

高膽固醇

衣食足而知榮辱，飽暖然後至會思淫慾，所以好多男女床戰之前都會飽餐一頓。不過，好多醫學報告都話，食飯之後唔好即刻做劇烈運動，上床當然亦係劇烈運動嘅一種啦！另外，進食嘅食物當中若然含有高膽固醇亦會影響性趣，性學專家Stephanie Buehler博士就話，過量膽固醇會令女士們三角地帶嘅血液唔得流通，因而令性趣難以喚起，就算有性慾，做愛嘅時候亦難以得到快感喎！

激嬲對方

男人要喺床上威風八面，一定要夠陽氣。而偷走女伴性趣嘅亦係氣，不過則係一股怒氣！點解女人會發嬲？原因有好多，例如辛辛苦苦煮完餐飯，你唔幫手拎碗碟筷子；甚至食完飯連幫手執枱都懶，只顧住上網玩手機等等，都會令女人突然發嬲。所以作為男人，特別係一個慾火焚身嘅男人，千祈要對女伴招呼周到，以免對方怒氣上湧，開門走人。