走為上着
早排睇到鳳姐被殺害嘅新聞，真係驚到我瞓唔到覺，因為同客人上到房閂埋門之後，發生咩事都冇人知，所以真係好危險。不過呢啲嘢好多時都係防不勝防，惟有靠自己提高警覺。早排我就遇到個行為怪異嘅客仔，佢係由一個熟客介紹嘅，諗住唔會有大問題，點知喺我沖涼嘅時候，佢突然衝入嚟對住塊鏡自言自語，起初以為佢搞吓笑，但係見佢個樣愈嚟愈認真，嚇到我唔敢郁。過咗分幾鐘之後，佢先至回復正常，仲笑笑口問我點解沖涼沖咁耐，我咪同佢講番發生咩事囉，佢竟然話唔知自己剛才做過啲乜喎，心諗唔係咁恐怖呀，玩鬼上身咩，我見勢色唔妥，梗係拿拿臨着番衫走為上着啦！