成日同班沉緊船嘅老友講，叫佢哋沉還沉，千祈唔好偷睇隻船嘅手機短訊，費事睇到啲唔想睇嘅嘢。話說阿輝隻船係喺倉仔度認識，有晚佢同隻船食飯，女方就約埋個姊妹出嚟，呢個姊妹自爆本身有個台灣佬包養，但同時又跟另一個男人一齊，兩人經常透過短訊傳情。阿輝就諗：「唔知我條女背後有冇另一個老細呢？」於是佢就趁隻船同個姊妹去洗手間嘅時候，偷睇對方嘅手機短訊，結果發現原來條女同另一個男人有路，不單止互傳情慾短訊，早幾日女方仲叫男方開定房等佢。阿輝戴綠帽梗係扯晒火，即時同隻船分手，飯都唔食就走人。