世界波：對性上癮唔止鹹濕咁簡單

美國曾經有不少知名演員話自己有性上癮（Sex Addiction）嘅問題，不過一般人都覺得性上癮只係一個藉口，只不過用嚟掩飾自己嘅淫蕩行為。但美國加州大學洛杉磯分校嘅心理學家在最近一項研究指出，性上癮其實係一種新型精神病，足以摧毀一個人嘅事業、人際關係同埋身體健康，並非純粹鹹濕咁簡單。

專家指出性上癮嘅病徵，包括喺冇濫藥或疾病等因素影響下，持續6個月或以上有性幻想、性衝動同埋性行為。此外，若在抑鬱或不快情緒下有固定性活動，或者經常利用性行為去紓緩低落情緒，都可能係患咗性上癮。再睇埋以下四個實例，就可以初步了解自己有冇患上性上癮！如果有，就要及早治療喇！

一夜情停不了

專家指出一個有性上癮問題嘅人，無論男女都好鍾意不停發生一夜情，各式各樣嘅一夜情都會勇於嘗試，包括車震、廁格快餐、爆房、打野戰等等。總之就係唔偷食唔安樂，就算係已婚或者身邊有固定伴侶者都一樣！更試過有患者被捉姦在床，對方嘅妻子甚至拎槍指住佢個頭作威脅，但事後佢仍然戒唔甩一夜情嘅嗜好。

寧自慰唔返工

專家指性上癮者，打色情電話、上網瀏覽色情網頁絕對係等閒事，而且仲係每日嘅例行公事，甚至會買備各式各樣嘅自慰用具。有時候會因為太投入自慰嘅快感，而晏咗返工，甚至唔返工留喺屋企自慰一整日，當然呢啲性上癮者大多都未婚或冇伴侶啦！

唔做愛就焦慮

至於已婚及有伴侶嘅患者，就會經常向伴侶提出性要求，一旦對方拒絕的話，就會顯得好焦慮。甚至會不停動腦筋，想盡辦法令伴侶配合自己嘅性需求。每次做完愛之後，佢哋都會覺得情緒得到紓緩，但不消三數小時，性癮又會再起，焦慮再次出現，令情緒大受困擾。

願當性工作者

專家指出甚至有嚴重嘅病患者，會做出極端行為去滿足慾望，例如有人自願成為性工作者，亦有人願意公開表演，甚至不收分文，當上性義工，目的就係不斷尋找性愛對手，以滿足性需要。性已經成為呢啲患者嘅「良藥」，一日唔做愛就會病發，問題都真係幾嚴重！