世界波：按摩五穴企硬話咁易

男人鍾意按摩已經係不爭嘅事實，無論係邪骨定正骨，統統無任歡迎，但其實推拿按摩喺中國已經有幾百年歷史，按摩除咗紓緩肌肉痠痛外，仲可以作為傳統治療工具。小至傷風感冒，大至性功能失調，都一樣幫到手，各位有興趣嘅男士，不妨學番幾個穴位按摩，叫女伴得閒就幫你按吓，有病醫病，無病壯陽！

以下呢5個穴位，都係用嚟調理男士性功能嘅穴位，多按有益無害，而且有啲穴位位置方便，只需於每朝搭車上班時，按上幾分鐘，就可以有效改善問題，假以時日，配合其他穴位同按，要你隨時隨地企硬都唔係問題！

商陽穴強精壯陽

商陽穴位於食指尖端外側指甲旁，傳統中國醫學認為，刺激該穴具有明顯嘅強精壯陽之效，可延緩性衰老。咁方便嘅位置，隨時都可以按得到，尤其是朝早搭車返工時，與其玩智能電話，不如按吓商陽穴，或者用兩隻食指互相扣住反覆牽拉，都可有助刺激商陽穴，當然，最好就係搵啲硬物，向穴位反覆按壓五分鐘，已經好足夠喇！

關元穴位於肚臍下3吋，屬於正中貫穿胸腹嘅「任脈」。所謂「任脈」是指不論男女都與生殖系統有密切關係嘅一條經脈，任脈上有不少具強精壯陽功效嘅穴位。閒時用指壓方式刺激關元穴，或用左右手交替旋轉按摩腹部，都可令整條「任脈」暢通無阻，生殖器官自然強健過人。

三陰交穴就係肝經、脾經、腎經三條陰經交會之處。三陰交穴本身屬於脾經，位於脛骨內側、腳內踝上約10厘米嘅地方。經常按摩呢個穴位，可以治理遺精、陽痿、陰莖疼痛、小便不利、睾丸縮腹等症狀，係治療男士性功能障礙最常用嘅穴位之一。無病無痛嘅男人，亦可以按摩此穴，藉此增強性能力！

湧泉穴位於腳板底嘅中心，屬於足少陰腎經。每晚臨睡前用熱水浸腳，以及用手指按壓呢個穴位，又或者赤腳踏上凹凸板，總之就係要令穴位受到刺激，自然可以改善性功能。

築賓穴位於三陰交穴後上方約2吋、小腿肚內側，呢個穴位專門針對性慾胃口問題，如果最近覺得自己性慾低迷，飽飽滯滯的話，就可於每晚放工回家後，一邊睇電視、一邊按摩此穴道，包你好快就會胃口提升，性慾高漲！

七瀨