小心上錯賊船

老友阿聰高大靚仔,年薪過百萬,有車有樓,只係冇女朋友。其實以佢咁好條件,搵女朋友一啲都唔難,但係佢偏偏沉咗隻深圳船。雖然呢個囡囡質素超班,仲操得一口流利英語,帶出嚟一啲都唔失禮,只係講到尾佢都係囡囡,始終唔係正經女子囉!

阿聰話呢隻船最好嘅地方,就係唔會逼佢結婚,事關佢以前同個女仔拍拖,對方見佢有米,拍拖三個星期就催佢結婚,搞到佢不知幾頭痕。家陣呢條女就唔同喎,從來唔會提結婚,而且對佢相當體貼。阿聰又話,若然條女真係要結婚,佢都冇所謂,因為對方講過會同佢簽合約,就算日後離婚,都唔會分佢身家。講真我唔係黑心,有機心嘅船小弟真係見過唔少,所以阿聰唔好咁老定,未到最後都唔知道自己係咪上錯賊船囉!

錨王