臭味相投
老友阿群份人冇乜點，衰在有體臭，搞到啲囡囡走夾唔抖，更枉論做佢條女要日對夜對吖！不過正所謂「冤豬頭都有盟鼻菩薩」，早排佢自爆喺東莞沉船，家陣已搬埋上去深圳同囡囡一齊住，為求可以晚晚見面喎。我以試探性口脗問阿群：「你條女有冇送香水畀你呀？」阿群即刻笑道：「我知你想講乜，條女又真係冇嫌棄，仲話我好有男人味添！」心諗係咪條女「坤」你咋？點知早兩日阿群帶埋隻「船」出嚟食飯，發覺佢之所以咁冧條女，確係有原因，事關條女身上陣味同阿群不相伯仲，唔知嘅仲以為佢屋企係曬蝦醬，最攞命就係阿群仲好冧咁話：「我最鍾意佢陣體香，真係好Sexy呀！」噢！果然係臭味相投呀！