沉極都係嗰隻船
沉船一次都唔夠，仲要一沉再沉，莫非真係咁鍾意沉船？阿昌幾年前北上去夜總會玩，搵咗囡囡阿雲陪坐，之後阿昌對阿雲念念不忘，往後幾次去玩，都係Mark番阿雲招呼佢，結果阿昌成功奪得女方芳心，及後兩人便同居。點知有一日，阿雲話要返鄉下做生意，要同阿昌分手。一年後，阿昌喺深圳一間夜總會重遇阿雲，對方已經由囡囡做咗媽咪，阿昌發覺阿雲多咗份成熟味道，加上對方依然對佢溫柔體貼，結果兩人愛火重燃，再次同居。但係一個月後，阿雲話要返鄉下嫁人，跟住兩個又散咗。早排阿昌喺一間桑拿竟然再遇見阿雲，對方解釋話佢最後都冇結到婚，所以返嚟做技師搵食，並向阿昌提出復合，於是阿昌又再一次沉船。我問阿昌點解咁鍾意條女，佢話唔介意對方係咪真心，只要兩個人相處舒服就冇問題喎！