世界波：性感衝撞 內衣美式足球聯盟

美式足球在美國係頭3位最受歡迎嘅運動，不過呢種運動衝撞性好厲害，所以一向都係男人天下，每年嘅「超級碗」大賽，更係全美人民嘅焦點盛事。原來美國女人早已靜靜起革命，成立咗一個名為Lingerie Football League（LFL）嘅聯盟，推動女人穿起性感球衣，打美式足球，令好多男球迷大呼正斗。

相較喺美國國內好流行嘅終極格鬥錦標賽（UFC），又或者世界摔角娛樂（WWE）等，LFL暫時冇咁大名氣同埋入場人數，但隨住電視轉播賽事嘅增長，同埋入場人數不斷增加，LFL已經開始喺北美地區紅起嚟，喺嚟緊嘅8月25日更會喺加拿大上演首場賽事，令人十分期待。

巨乳衝刺

呢個LFL係一個好專業嘅運動聯盟，一共有12隊女子職業球隊，能夠落場比賽嘅球員，都受過嚴格嘅美式足球訓練，唔係柴娃娃露波、露股咁簡單。

雖然好多球員都擁有一對美乳，再加上球衣相當性感，經常露出南北半球，令球迷大飽眼福。但佢哋完全唔錫身，衝撞起上嚟，絕對不比男球員遜色。刺激肉搏嘅賽事，再加上性感香艷嘅美女球星，難怪賽事愈來愈紅，愈來愈多人捧場。

拉甩衫褲

有睇過美式足球嘅朋友，都知道呢種運動除咗用撞擊去阻止敵方前進之外，仲可以用拉腳、抱身嘅方法，將對方球員制服，所以呢班性感女球員打起上嚟，仲狼過班男人，全場又拉又抱，戰情激烈時，隨時會拉甩對手條小三角褲，仲有上身嘅性感乳罩。現場參與嘅觀眾，絕對可以感受雙重嘅官能刺激，精彩場面更加令人目不暇給。

球迷闖關

12隊球隊中，每隊都各自有受歡迎嘅美女球星，更有不少美女已經成立咗Fan Club，呢啲Fans好鬼熱情，十足女球迷迷戀男球星一樣，每次自己偶像出賽，就一定親身捧場，仲喺球場上大叫大喊，舉起性感女神等標語。有啲激進球迷更會趁亂衝入球場，撲向自己心儀嘅女神，搞到現場其他Fans蠢蠢欲動。幸好球場保安早知道球迷見到咁多性感靚女，一定會好衝動，早已布下嚴密布防，球迷想闖關真係唔易o架！