世界波：爆乳球僮陪打高球

高爾夫球一向都係比較男性化嘅運動，場內嘅球僮大部分都由男性擔任，不過美國拉斯維加斯卻有一間「Royal Links Golf Club」，不但有駐場女球僮服侍左右，更有衣着性感嘅「ParMate Caddy」陪客人打波。不過呢啲爆乳球僮嘅波鐘，計落大約要US$100，仲貴過去夜總會搵女陪，值唔值真係見仁見智。

呢間「Royal Links Golf Club」有超過50位駐場爆乳球僮選擇，位位都性感誘人，雖然佢哋唔會幫你孭球袋，但執波、擺波、耙沙坑呢啲指定動作佢哋都會照做嘅。而且佢哋嘅高球技巧更加係有板有眼，就算客人唔當佢哋係球僮，當係比賽對手都一樣得。

歡迎打情罵俏

好多會員入去呢個球會打波，目的其實唔止打波咁簡單，正所謂醉翁之意不在酒，裏面嘅爆乳球僮先至係佢哋嘅目標。大家可以互相交流打波心得之餘，仲可以喺一片青葱嘅球場上打情罵俏，感覺特別窩心。最重要係客人一邊入洞，一邊可以同美女談笑風生，打到「小鳥」更可以咀啖慶祝，自然打得更有樂趣。再加上位位爆乳球僮都好專業，經常會擺出挑逗甫士幫你騷擾對手，令對方分心，想贏波自然更容易。

低胸制服誘惑

除咗陪打波之外，每位爆乳球僮仲會穿上性感誘人嘅低胸制服，嗰條短裙仔喺微風嘅吹拂下飄飄吓，感覺勁養眼，唔少球場上嘅男士都覺得愈打愈熱，好想搵人救火。不過呢啲爆乳球僮全部都係正經人家，有啲仲係嚟做Part-time嘅大學生，想要佢哋提供另類服務，應該冇乜可能嘞，但仍然會有啲客人借啲意抽水問價！

球會內其中一位ParMate Monica就表示：「以前都試過有客人問要畀幾多錢先可以睇我個胸，我就答佢呢個係Golf Course，咁問係好唔禮貌嘅，通常佢哋聽到都會知難而退，如果有客人有過分舉動，我哋自然會通知同事處理。」其實呢啲ParMate收成US$225一個人咁貴，仲未計貼士（通常係US$100），令人誤會有特別服務提供，真係唔出奇嘅！