落鴨店搵幫手

喺電話中，Macy以一副事不關己、己不勞心嘅口脗同我講，佢話Richard嘅對頭好猛料，係太子黨嘅臥底心腹，成日派佢出巡查找各個高層嘅錯處，今次應該係臥底要交差，所以求其搵一個做替死鬼，再加上Richrad份人唔識做，上次開會曾經得罪過佢都唔知，依家畀人擺上枱一啲都唔出奇。我聽到Macy副口脗，似乎真係好難搞，而且死亡率仲好高添，鬼叫佢得罪太子黨嘅人，唔死都一身蟻！

今次真係唔知點樣幫佢先好，如果直接同Richard講佢得罪咗太子黨，個傻佬隨時會跑上去同高層理論，到時咪知道有人放風？咁樣對Macy同我都好麻煩。但唔話畀佢聽，佢又死得不明不白，我都係要再三仔細思量，諗吓呢壇嘢有冇得救先！我突然間諗起闊太Judy好似識得我哋太子，於是我靈機一觸，決定從Judy入手，今晚一於約佢去朝偉間Club聚一聚，話晒我哋都係識食之人，同佢一邊摸住鴨仔隻雀，一邊慢慢傾，應該會有眉目。

我諗好晒之後，就入去Richard間房，同佢講我已經收緊風，希望佢暫時唔好有任何行動，就算對方逼到埋身，都要忍一忍先，我會盡快同佢想辦法。佢用好無助嘅眼神望一望我，雖然我知道佢唔相信我可以幫到佢，但係佢眼神充滿咗感激。我忽然間覺得自己好似變咗另外一個人，因為以前我明明同Macy係同一路人，事不關己、己不勞心就係我嘅政策，邊個波士上任，我都係咁做o架啦，點解今次忽然間咁上心呢！莫非我真係轉咗性？

好彩入夜之後，我嘅本性一啲都冇變，因為去到朝偉間Club之後，我就立即打雀咁眼，周圍(目及)仔，心情好不興奮，差啲唔記得自己今次有任務在身，經過一個充滿陽光氣息嘅靚仔身邊，我仲忍唔住伸手去撚吓雀添！個靚仔見我咁多手，立即主動送多嘢畀我，我即時就決定今晚要轉轉口味，一於試隻滷水鴨……（待續）

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。