世界波：Sasha Grey有腦又肯剝

唔少標榜美貌與智慧並重嘅選美比賽，好多時選出嚟嘅佳麗都係有智慧、冇美貌，甚至兩者皆缺。唔通呢兩樣嘢真係唔可以並存嘅？當然唔係啦！美國四仔界就有唔少人氣脫星，唔單止有學歷、有智慧，個樣同副偈都嗒得杯落，證明有腦有樣嘅索女都一樣存在！

美國早排有個研究指，美國脫星嘅智商最低只得69，呢個數字代表佢哋有智力上嘅缺陷。一班四仔迷睇到後就梗係戥佢哋唔抵，於是就搞咗個選舉，選出有樣又有智慧嘅脫星，而且佢哋仲要符合拍咗過百套四仔呢個條件，話咁至有說服力同代表性喎！結果就由Sasha Grey得到脫星界才女嘅稱號！

語言天賦

今年24歲，喺美國內華達州出世嘅Sasha Grey，早喺06年已經投身四仔界，喺呢6年間，佢已經拍咗超過170套四仔，即係平均每年約30幾套。拍咁多片，唔單止證明佢人氣高，亦說明佢嘅外形好吸引，否則邊度得嚟咁多四仔迷歡心？

不過呢位索女唔單止得個樣，仲極富語言天賦，除咗英文，仲精通希臘文、波蘭文、以色列文、法文等9種語言。中學畢業後嘅佢，更係好學不倦，不但繼續進修電影、藝術、音樂等課程，其後更喺紐約大學進修藝術課程，並得到一級榮譽學士。

得到賞識

雖然Sasha精通外語，又係藝術系高材生，但呢啲都唔能夠充分表現出佢嘅智慧。Sasha不但讀書讀得叻，更相當有頭腦。首先佢將四仔作品藝術化，並首次將藝術電影嘅拍攝風格，融入佢嘅作品裏面。Sasha解釋佢之所以要咁做，目的係要提升四仔嘅藝術性。佢呢種態度更獲得美國著名導演Stephen Soderberg嘅賞識，邀請佢演出電影《The Girlfriend Experience》，更因為出色嘅演技而大受好評，從此參與電視劇嘅演出。

此外，佢又組成樂隊「aTelecine」，做唱作人之餘，更推出唱片並舉辦演唱會。Sasha最近更做埋義工兼教師，宣揚保護動物嘅訊息，果然係個有智慧又有愛心嘅才女！

Profile

出生日期：1988年3月14日

三圍：32B-26-31

身高：5呎7吋

Shy Love雙碩士銜頭

如果閣下係忠實四仔迷嘅話，應該一定聽過Shy Love嘅大名。呢位四仔天后級人馬，出道9年，拍咗超過250套四仔，但最令人估唔到嘅係，佢竟然係資優兒童。16歲高中畢業嘅佢，25歲就取得會計學士同碩士學位，仲係稅務碩士添！

Profile

出生日期：1978年11月27日

三圍：36D-24-34

身高：5呎5吋

AJ Bailey英王子校友

呢期紅到爆嘅脫星AJ Bailey，唔單止樣靚身材正，更係英國威廉王子嘅校友。冇錯！原來AJ擁有蘇格蘭University of St. Andrews嘅人類學學士學位，呢間著名學府喺英國嘅排名，僅次牛津同劍橋。據講，佢更曾經同威廉班老友一齊修讀經濟學課程添！

Profile

出生日期：1980年9月3日

三圍：34D-26-35

身高：5呎8吋

Sarah Peachez文壇俏嬌娃

有人話脫星有身材冇頭腦，胸無半點墨，呢個諗法其實係錯嘅！美國出生嘅脫星Sarah Peachez，不但係聖安東尼奧大學英國文學系嘅畢業生，更係紐約大學創意寫作系碩士，而佢嘅畢業作品，就係一篇用批判主義角度寫成嘅小說，唔知幾時有機會拜讀吓呢？

Profile

出生日期：1985年8月15日

三圍：32AA-24-35

身高：5呎5吋

四仔界高智商代表Asia Carrera

若然覺得有藝術成就，或者學歷夠高，都唔能夠代表有智慧嘅話，唔緊要，用智商嚟計，相信可以說服到你，認同脫星都可以好聰明。著名脫星Asia Carrera嘅智商就高達156，只係僅次於愛因斯坦，問你服未！

Profile

出生日期：1973年8月6日

三圍：36C-26-36

身高：5呎9吋