學跳舞冧客
早前睇到報道話有歌嫂喺酒樓表演火辣勁舞，睇到現場啲麻甩佬High爆，難怪啲客人埋怨我唔識跳舞氹佢開心啦！我諗都有需要增值一下，因此我選擇學鋼管舞。經姊妹介紹下，我去咗深圳一間私人教授鋼管舞中心，雖然學員清一色係妙齡少女，但估唔到佢哋大部分舞技高超，凌空拗腰再倒吊擘一字馬呢一連串高難度動作完全難佢哋唔倒，真係睇到我「O」晒嘴！我問過幾個學員，原來佢哋學鋼管舞唔係為興趣，而係為咗男人，好似其中一位20歲未夠嘅女仔，講到明係跳畀男友睇喎，計我話佢實情係跳畀啲客睇至真，唔係又點會周身名牌連工都唔使返先？另一個四川女仔就最坦白，佢自稱嚟深圳嘅目的係為咗搵銀，所以學定一招半式，希望將來申請過埋澳門跳舞搵食。家陣啲北妹咁識自我增值，而我哋班港援再只係貪威識食嘅話，肯定會畀佢哋搶晒生意啦！