性、愛分家論

原來夏日炎炎，最令人快慰嘅事就係打水戰，自從我同朝偉打完場好精彩嘅水戰之後，成個人都精神抖擻，好似打咗羊胎素一樣咁正斗。所以話啫，女人唔補好易老，唔識食仔就更加易老，姊妹們好應該學吓我Barbara咁識食。就算你一世人忠於一個男人，到佢有一日發現你面上多咗幾條皺紋，手臂肉開始鬆弛嘅時候，佢哋就會開始想出外解決生理需要，而你就愈來愈乾旱，終年冇人光顧，惡性循環之下，結果愈來愈老、愈來愈冇光彩，黃面婆就係咁樣誕生！

所以我認為現今嘅女人，唔可以再容許自己變成黃面婆，一定要反客為主，男人可以將性同愛分開，點解女人唔可以？或者有人認為女人天生性、愛不分，有愛先可以有性，但經過我Barbara親身探索性愛之路後，我覺得女人一樣可以將性同愛分家，就算單純有性冇愛，同樣可以令女人容光煥發，心情愉快！

講完一大堆「Barbara道理」之後，我要重拾工作動力，因為辦公室出現咗真正嘅危機，波士Richard半夜1點鐘打畀我，話事態嚴重，佢有可能過唔到呢個月。我個心即刻沉一沉，究竟係邊個咁討厭，放完暗箭唔成功，再繼續出招，務求要將Richard置諸死地呢？我體內嘅戰鬥激素又再次上升，我要為Richard做番啲嘢，因為佢的確係位好波士，我唔忍心佢就咁樣犧牲，於是我第二朝立即打畀樓上Macy收風，打探事情嘅來龍去脈……（待續）

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。