世界波：天體Resort裸滿Fun

夏天不但係泳客熱愛嘅季節，亦係天體迷出動嘅日子，讓佢哋享受陽光之餘，並同大自然嚟個至爽、至貼身嘅全接觸。早排美國就有旅遊網站搞咗個選舉，列出幾個景靚又具有特色嘅天體度假村，等天體愛好者可以喺呢個炎炎夏日，裸住曬兼玩住嗌！

網站精選咗幾個各具特色嘅天體度假村，個個都環境優美，設施齊全，但細睇之下先發現，入選嘅天體度假村中，有唔少都位處墨西哥。除咗因為當地有唔少水清沙幼嘅泳灘之外，亦因為墨西哥呢個熱帶風情洋溢嘅地方，對天體愛好者別有一番吸引力。

Au Naturel Club 運動之樂

咪以為去天體度假村只可以剝光豬曬太陽咁單調，如果你去到Au Naturel Club後，就會發現呢個度假村內，除咗有靚海灘，仲有一個設備齊全嘅運動區，當中包括網球場、足球場、高爾夫球場、排球場等。如果你驚經常喺戶外曬得滯，亦可以喺運動中心內嘅健身室、桑拿浴室、桌球室等地方邊玩運動邊同一班同好吹水，無論室內室外玩意都滿足晒客人需要！

地點：墨西哥Riviera Maya

Cabanas Copal Resort 臨海魅力

雖然唔少天體度假村都有提供主題特色套房，畀天體愛好者入住。只係對佢哋嚟講，既然一場嚟到，梗係想24小時都同大自然保持親密接觸啦！如果係咁嘅話，Cabanas Copal Resort就最適合不過。村內除咗設有豪華酒店套房外，臨海區域仲有多間富當地特色嘅半球形泥屋，不但讓住客裸得舒服，亦可以領略當地人文氣息。

地點：墨西哥Tulum

Club Orient Resort 戲水假期

對鍾意玩水上活動嘅裸體愛好者嚟講，位於荷蘭嘅Club Orient Resort就一定滿足到你。村內有一個水清沙幼嘅海灘，不但能夠畀天體人士喺度享受日光浴，沙灘上更設有各種球類活動設施。此外，度假村仲有滑浪板、獨木舟、水上電單車、滑浪風帆等器材租賃，等大家可以盡情戲水。

地點：荷屬聖馬丁島

Garden of Eden Resort 特色泳池

一直以嚟，天體活動同水嘅關係相當密切，因此好多度假村不但設喺海邊，裏面仲設有泳池供天體泳客使用。不過講到特色泳池數量最多，就要數Garden of Eden Resort。度假村內單係戶外泳池就有4個，另外18間獨立度假屋內各設有不同主題嘅特色泳池，啱晒每位天體客嘅心水，仲係搞裸體泳池派對嘅勝地添！

地點：巴拿馬Isla Solarte

Living Waters Spa 沙漠溫泉

沙漠有天體度假村本嚟已經夠特別，裏面仲有溫泉浸，係咪好過癮先？位於美國加州嘅Living Waters Spa就擁有如此與眾不同嘅特點。內裏除咗有一個天然溫泉，可以為嚟自世界各地嘅天體愛好者提供Relax嘅地方外，仲有相當豪華又可飽覽無敵沙漠靚景嘅Spa房，等大家可以歎番個超正嘅裸體Treatment。

地點：美國加州

Punta Serena 綠色生活

天體愛好者視裸體活動為綠色生活嘅重要一環，因此呢間主打綠色裸之生活嘅Punta Serena度假村就應運而生。喺呢個極度綠化嘅裸體度假村內，大家不但可以盡情浸淫喺一片綠油油、水天一色嘅大自然環境中，度假村內仲有瑜伽、按摩、健身操等課程舉辦，讓天體客過番一個綠色假期。

地點：墨西哥Tenacatita