世界波：千奇百趣性玩具

搞爛Gag唔好笑，無知先至最可笑！有留意新聞嘅爸打，相信都知我想講乜。話說早前西安有位女記者，以為喺古井挖出嘅男用矽膠自慰器係肉靈芝，中港台同胞笑爆女記者及相關新聞節目負責人，連外國網站「The Frisky」都忍唔住轉載笑鑊甘，真係乜面都丟晒！不如就趁今日介紹幾件估你唔到嘅爆趣性玩具畀大家見識吓，下次見到時就唔使畀人呃兼「老點」咁（火羅）啦！

香港唔止性教育失敗，連性玩具市場發展都一樣半桶水，事關有唔少女人視床上情趣用品如洪水猛獸，覺得玩震蛋、震棒嘅一定係淫娃蕩婦，更視性商店為邪惡黑店，心態咁守舊，性事又點會有進步？其實唔想玩冇人強迫你，但連性玩具都唔識分就抵畀人笑你無知啦！唔想成為被恥笑對象？不如你又估吓以下幾款性玩具係乜東東呢？

首飾類

乳首吊墜：假如各位爸打正頭痕送乜嘢禮物畀女伴，咁呢款咁大方得體嘅頸鏈就啱晒喇！皮繩配以兩個不銹鋼吊墜，有金銀兩色選擇，係咪好Fashionable呢？查實吊墜內係震蛋，只需一粒電池驅動，而連住吊墜嘅皮繩於戴上頸鏈後正好落喺女士乳首上，爸打對啱位置一索，即刻夾住囡囡粒粉提，開埋個震蛋，爽晒！

名稱：Droplet Necklace

售價：US$109 （約HK$850）

晶石羊眼圈：好多人鍾意帶「蜜蠟」手鏈，據稱其所藏正能量能為佩戴者帶來好運，不過大家千祈咪買錯呢條茶晶（Smoke Quartz）製成嘅羊眼圈呀！每粒晶石尺寸為12-14mm，羊眼圈闊度可任意調校，只需於開波前套喺子孫根上即可。不過生產商建議唔好連續使用超過20分鐘，莫非怕晶石發功過度會爆？

名稱：Smoke C-ring

售價：US$65（約HK$507）

軍Look類

穴位刺激萬用刀：佢唔係Pizza刀，亦唔係萬用刀，純粹係穴位刺激用具，專供前奏時使用。生產商話男女全身有唔少性感穴位未被開發，想完全投入性愛中，事前不妨碌兩碌，但力度唔好過猛，否則樂極生悲，閣下自理！

名稱：Razor

售價：US$99（約HK$772）

擴張手榴彈：呢件似手榴彈嘅物體，其實係SM味超濃嘅女用陰塞，將圓頭部分放入囡囡體內，然後順時針扭動、圓形蛋頭就會呈三扇形慢慢分開，扭得愈深角度愈大（最大為45º角）。蛋鎖仲附有一個鎖頭，若然男人進入後被鎖住，唔知會點呢？

名稱：蛋鎖

售價：￥23,860（約HK$2,314）

得意類

迷你壽司：港女最鍾意食壽司，你話外賣嗰陣夾埋件震蛋壽司喺裏面係咪夠晒驚喜呢？一式4款嘅吞拿魚、甜蝦、玉子及八爪魚壽司，造工精細、尾部有個迷你白色可拆式防水震蛋，就咁望落同嗰啲壽司造型嘅USB手指好相似，小心攞錯返公司。

名稱：壽司震蛋

售價：￥819（約HK$79）

Cutie公仔：呢個公仔睇落好得意，其實係一個按摩器，只要放喺敏感部位，嗰四條「觸鬚」啱啱好可以刺激周邊地帶，加埋大腿一夾，爽晒！玩到攰咯，用嚟按摩其他部位嘅痠痛肌肉都得o架！

名稱：快樂震熊

售價：￥1,995（約HK$193）

名師設計類

激震象棋：圖中呢套國際象棋都算架勢堂，由法國Kiki de Montaparnasse及Aruliden兩間情趣用品大廠跨科出品，每Set共32支不同形狀震蛋，全人手裝嵌，採用醫療級矽膠製造，防水防敏。除咗用嚟爽，真係可以當棋捉，可惜玩限量生產，有錢都未必買到。

名稱：Kiki de Montaparnasse Chess Set

售價：US$10,000 （約HK$78,000）

嫩綠假蘆薈：眼前呢支「Aloe」似足真蘆薈擺設，原來設計師就係想將性玩具明目張膽擺上枱先至咁設計。白色「花盆」係充電插座，有需要時就拎起支蘆薈安慰自己，可惜產品不作公開發售，想買就要Send e-mail去訂造，真巴閉！

名稱：Aloe

售價：未定價