純慾的快感

朝偉望住嗰啲金光閃閃嘅鈔票，眼神立時變得閃亮，佢嘅眼神好清楚話畀我聽，佢鍾意錢多過女人好多，因為佢成晚都冇用過呢種眼神望我，我可以好放心，終於搵到一個唔需要談情嘅男人，難得佢床上表現又可以去到101分，試問我仲有咩理由拒絕再搵佢。不過我冇將內心嘅喜悅流露出嚟，只係輕輕講咗一句再見就離開。

離開酒店嘅時候，我身心都好舒暢，完全冇砌足一晚嘅疲倦感，唔知係咪我真係天生大食，砌極都唔覺攰，反而冇得砌嘅時候，就好似一條鹹魚咁，冇晒朝氣同活力。

今日係星期日，我喺酒店出嚟之後，感覺特別暢快，因為條街比平時少人，愈行愈舒服，途中經過一間花店，我見到好多好靚又五顏六色嘅繡球花，忍唔住立即衝入去買咗一大束，雖然佢嘅壽命好短，價錢又好貴，但係我覺得好值，因為喺我心目中，最幸福嘅事情唔係天長地久，一刻嘅燦爛反而最令我動心。好似尋晚朝偉不停咁將我帶上高峰，我都唔知自己「嚟」咗幾多次，嗰種感覺先至係我一直所追求嘅！當性愛混雜咗愛情之後，我就冇辦法再次享受到呢種純慾快感。

過咗一個好滿足嘅周末，星期一我梗係精神奕奕咁返工，不過一返到公司，就見到波士喺房入面，好大聲咁講緊電話，雖然我聽唔到內容講啲乜，但係從佢面上嘅表情，我知道一定有事發生，而且唔係小事。我冇刻意去關心佢，只繼續做分內事，佢終於忍唔住出嚟約我食Lunch，佢話要搵個人發洩一下。我立即反駁佢：「波士，我份糧只係For秘書工作，冇包到提供發洩服務o架喎！」佢畀我激到哭笑不得：「咁我下個月加你人工囉！」我立即展現四萬笑容：「咁就唔同，因為未來我將會有好多錢要使，事關我迷上咗一隻鴨！」佢目瞪口呆咁望住我，唔知點回應好……（待續）

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。