沉船
嗰日同班Friend去飲嘢，當中有條仔自爆早排沉船，後嚟畀條船飛咗，搞到心情好Down。原來佢愛上咗個歡場女子，都話歡場冇真愛o架啦！都唔明點解仲要舂個頭埋去囉！其實唔止男人係咁，身邊有個姊妹亦曾經愛上一個唔應該愛嘅男人，唔係鴨仔，而係自己嘅客人！
呢個姊妹有個熟客，起初兩人只係賓主關係，後嚟發覺對方對佢好好，又經常打電話畀佢噓寒問暖，有時兩人約出嚟行街睇戲食飯，跟住佢哋就開始拍拖。後嚟佢發現對方原來已有家室，不過佢唔介意，但係唔夠3個月，個男方就經常搵藉口唔見佢，又話要返內地做嘢，最後冇咗影。搞到佢冇晒心機，有客都唔接，我勸佢以後唔好再咁傻，千祈咪為仔死為仔亡，趁後生搵多啲錢買番啲名牌嘢補吓身，好彩佢聽我勸，依家佢好努力賺錢，唔再談情說愛。