世界波：邁阿密　火辣博覽多嘢(目及)

夏日炎炎，去邊處玩水降溫最爽呢？我會屬意美國嘅邁阿密，因為當地嘅海灘風光如畫，而且熱情洋溢，靚女特別多。不過，去到之後相信我又未必會去海灘，因為依家正值EXXXOTICA舉行期間，有展覽睇又有美女陪瞓，幾大都要去見識吓！

每到夏天小弟就好開心，因為街上好多靚女都會換上性感Tube Top小背心，行街時雙眼可以大吃冰淇淋之外，仲可以去海灘玩吓水，觀賞吓性感嘅比堅尼美女，甚至借啲意Join埋佢哋一齊玩。如果閣下唔鍾意玩水，都可以去各大成人博覽Hea吓，因為夏天正係世界各地成人博覽嘅熱門舉行日子。

節目豐富

近近哋可以過澳門參加亞洲成人博覽，不過就要等到8月，唔想等又有閒錢嘅爸打，則可以飛過美國參加剛剛喺尋日開幕、於邁阿密舉行嘅EXXXOTICA，飛到過去剛好趕得切參加最後一日嘅活動。

EXXXOTICA自2006年開始舉行，當初定為每年舉辦2次，分別喺邁阿密同新澤西州舉行。後來連芝加哥及洛杉磯亦有舉辦，才變成一年4次嘅活動。

每次為期3日嘅EXXXOTICA成人博覽會，都吸引到超過20,000名參觀人士到場支持，原因好簡單，因為節目豐富之餘，玩得盡興又盡性。今次於邁阿密舉行嘅EXXXOTICA，由5月18日玩到5月20日。為凸顯舉辦場地─邁阿密嘅熱情，會場內無論係Showgirl、服務員、脫星或舞孃，絕大部分都會以充滿夏日海灘Feel嘅火辣三點式登場，令現場氣溫急升。

噴火吞劍

其實令氣溫急升嘅唔單止係到場嘅火辣美女們，精彩嘅現場表演都一樣功不可沒。到底有乜表演呢？包括跳到雙腳離地嘅鋼管舞啦、倒吊半空搞到豐乳傾瀉嘅空中飛人啦、男女合演嘅意淫貼身舞啦，仲有真正火辣辣嘅噴火女郎表演火棒拋接以及噴火絕技，亦有盡顯喉嚨深度嘅吞劍表演！

想重口味少少，又可以欣賞舞台下嘅SM鞭打以及繩縛表演。若然覺得齋睇唔夠過癮，只要見到表演者邀請，就不妨踴躍舉手參與，因為佢哋絕對唔介意同到場人士合演一場愉虐表演，以增加氣氛。

美女陪瞓

能夠畀入場人士參與玩樂嘅，仲有SM專家攤位，參加者大可嘗試畀專家鎖住，再鞭兩鞭，又或者接受一下震動玩具刺激。雖然，專家為免犯法，唔會接觸到參加者嘅重要部位，但可以親身一試大師級嘅SM技術，對好此道者來說都算此生無憾。

此外，場內近年亦新設超大型充氣泳池，不過入面唔會放水，純粹畀觀眾入去同大會提供嘅比堅尼女郎彈吓跳吓，尋回兒時歡樂，仲可以乘機抽水添。畀人SM完，又同靚女彈完，一定覺得體力大量消耗，咁就不妨去到場館特設嘅睡眠休息區抖一抖。此區雖然只得大床一張，但係就有兩名身穿三點式嘅陪瞓女郎，等有需要人士可以畀錢入內，左擁右抱咁舒服地覺覺豬。不過有美相伴，好易搞到自己慶合合，睇怕都幾難瞓得着喇！