房事過密腎損耗
呢個星期好平靜，公事冇特別，私事更加係休戰期，所以一切都好似平平淡淡，對於過慣多姿多采生活嘅我嚟講，難免會有陣失落感。不過又係自己話要扯白旗停戰，一於疊埋心水，晚晚放工返屋企做Facial。唔知係咪近期獵食獵得太多，搞到個腎有啲耗損，連皮膚都差埋，除咗做Facial之外，仲要去睇中醫。你哋知啦，女人唔補好易老，如果連副偈都唔聽使，到時想玩都冇得玩。
所以我今日提早放工，去醫師度把把脈，點知唔把猶自可，中醫一把就把出我房事過密，但佢診症嘅地方其實就喺舖面，冇遮冇掩，所以當佢一語道破之後，立即引嚟其他人嘅艷羨目光，嗰一刻我真係覺得有啲尷尬，點知佢繼續大聲話，如果我再唔節制一下，唔止皮膚差，身體都會轉差。我見佢咁義正詞嚴，梗係唯唯諾諾，走嘅時候都費事望其他人，不過我隱約覺得有一對火辣辣嘅眼睛緊盯住我背後，但我因為尷尬，最終都冇回頭望清楚。
女人嘅直覺，好多時都好準，由我離開中醫館，到一路行返屋企途中，我仍然覺得有對眼(目及)實我，但係我次次突然回頭，都冇發覺有人跟喺尾後，我開始相信醫師嘅說話，莫非我真係房事過密，搞到依家精神緊張，疑神疑鬼？都係快啲返屋企休息先得。於是我加快腳步，好快就到咗大廈門口，突然間，有個好結實嘅身軀閃出嚟，嚇到我心驚膽跳，成個人彈起。望真啲，原來係牛頭角里安納度。我立即問佢點知我住喺度，佢話頭先喺中醫館撞到我，望咗我好耐，想同我Say Hi，點知我見佢唔到，所以佢咪一直跟喺我後面囉！佢講得好似好理所當然咁，但係我就聽到有啲毛骨悚然，覺得好似連環兇殺案嘅情節一樣……（待續）
Lady Barbara
某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。