潔癖症發作
上回講到我同牛頭角里安納度砌到身水身汗之際，我竟然覺得滿身汗水嘅佢好性感，或者係因為「性」到濃時，先至令我有呢種錯覺。但當我哋齊齊走上幾次高峰之後，感覺開始減退，我嘅頭腦亦回復清醒，我終於出手將佢從身上推開，嗰種黐嘅感覺，令我全身起晒雞皮，要即刻衝去浴室洗白白。
不過佢對我呢種態度冇任何反應，一直瞓喺床，直至我沖乾淨出嚟，佢仍然好好瞓，於是我決定自己着衫走人，反正雙方都已經各取所需，冇咩「遺言」好交代。就喺我準備離開之際，佢突然彈起身，問我點解靜雞雞走先，我就話只係費事嘈醒佢啫！佢唔係好接受我嘅解釋，一邊落床、一邊行埋嚟，我已經聞到佢身上嘅汗味逐漸逼近，我立即好抗拒，即刻擰轉面。佢想將我一擁入懷，我惟有使出推手絕技，立即將佢推開幾呎，之後就趁機開門逃走。
出房後，我直接衝入電梯，然後一口氣衝上的士返屋企，過程中我完全冇回頭嘅意思，只有逃得愈快愈好嘅感覺。可能有讀者唔明白，剛才先同對方翻雲覆雨，下一分鐘就驚得咁緊要，我係咪黐線嘅呢！其實有潔癖嘅人一定會明白，嗰種黐同汗臭味有幾難頂，就算係親密愛人都係咁話，更何況只係一夜情人，更加不能忍受。經過呢次冇預計嘅高潮，我都可以休息番個零月先再出動，事關返屋企做淨身行動，都要成個禮拜先洗得甩嗰陣汗味，帶住呢身汗味，蒙古大汗都唔騷我啦……（待續）
Lady Barbara
某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。