世界波：鹹網研討會食玩有女陪

對於好多白領打工仔嚟講，開會絕對係一件苦差，除咗要被困於會議室悶幾個鐘外，事前仲要預備資料，與會時又要做定心理準備畀老闆彈完又彈。不過，美國呢個鹹網研討會，相信冇人會覺得辛苦，因為入面有好多靚女陪你玩、陪你食，等你開會都可以Happy到震！

每個職業界別為咗團結業內人士，都會先尋求共識，以免各家互片，最終益咗外人。佢哋通常會組織工會，定期開會Update最新情況。雖然，成人娛樂界經常被外界睇低一線，覺得佢哋只係小圈子活動，實際上業界有唔少公司已經漸漸企業化、集團化，仲經常聯合舉辦博覽會，一齊攜手搵銀。

然而除咗廠商會搞聚會尋找商機外，鹹網組織亦會搞Gathering聯絡感情，而知名鹹網組織Phoenix Forum亦將於本月尾開會。

水準提高

早10年，小弟隨住時代步伐開始學上網之後，除咗成日用icq溝女，最常做嘅事情就係睇鹹網吸收性知識。不過，當時嘅鹹網真係令人睇到一額汗，除咗網站製作粗糙，仲經常散播電腦病毒。不過自從大家發覺經營鹹網好好賺之後，家陣嘅鹹網普遍都製作精美又安全，仲愈來愈多以集團式經營。據2010年嘅統計，較普遍被使用嘅鹹網約有42,337個，比率佔總網頁數量嘅4%，仲未計其他不知名鹹網，難怪鹹網集團愈來愈重視呢個市場。

赤裸陪客

Phoenix Forum呢個鹹網組織，為咗加強業界之間嘅溝通，所以每年3月尾左右，都會舉辦研討會，召集業界精英於美國亞利桑那州坦佩一個度假中心，一齊商討業界發展，今年嘅一屆將會於3月29日至4月1日進行。

叫得做鹹網業界研討會，其特色真係非一般同類活動可媲美，因為嘉賓一入場就可以見到裸女迎賓！冇錯，呢班美女會全裸示人，身上塗上色彩奪目嘅人體彩繪，一見到嘉賓到場就會上前大送秋波，帶嘉賓入會議室開會。開會開到悶，嘉賓仲可以換條泳褲去泳池游個水，池內有一大班比堅尼美女陪泳，即時令你悶氣全消。

真人表演

除咗有女陪玩，班靚女亦會陪客人飲飲食食，賭番兩手Poker。另外，與會嘅女士亦唔使擔心冇着落，因為大會亦安排咗一班精壯猛男大跳艷舞，而班猛男跳到性起時，更加會捉女嘉賓上台一齊跳添！而剛才提到嘅泳池，除咗有美女陪泳之外，池邊一樣有節目。因為唔少到場嘅脫星，會即場進行大混戰表演娛賓。

其實豐富嘅節目亦唔會局限於泳池附近舉行，運動場內一樣有好多嘢(目及)，就以上年為例，於小型足球場就搞咗個剝衫閃避球比賽，請來一班新進脫星到場用波互片，一個唔小心畀人用波掟中，就要剝一件衫，直至剝光豬為止，真係睇到班男嘉賓個個都想落場玩埋一份。