完美情人 陳潤熙

內地每年都有唔少選美活動，但能夠喺當中脫穎而出、順利進入娛樂圈發展嘅，往往都係啲三甲以外嘅佳麗，就好似今日介紹呢位靚女陳潤熙，曾參加國際中華小姐比賽，最後更打入全國五強之列。

來自湖南永州嘅潤熙，自小喜歡唱歌跳舞，17歲嗰年參加選秀比賽，當年佢打入前五名便止步，但係佢並冇氣餒，反而努力學習，報讀演藝課程，之後再參加國際中華小姐選舉，由預賽到地區複賽，愈戰愈勇，甚至殺入全國決賽。

工作接不停

最後潤熙成為全國五強，之後更有份出席全球大賽，雖然到十強時止步，但已經贏到唔少經驗同人氣，事關潤熙嘅身材十分出眾，加上當時需要經常着三點式示人，因而俘虜咗唔少網友。比賽後潤熙就做咗平面模特兒，由於身材標青，加上佢一啲都唔錫身，所以好多拍攝出嚟嘅寫真，噴血度極高，令佢人氣大盛，連帶商業價值都大大提升，自此廣告同埋代言合約接踵而來，比起有銜頭嘅佳麗，發展得更暢順，近年潤熙更專注電影拍攝工作，演技獲得一致好評。

出書做才女

潤熙除咗樣靚身材正之外，原來文筆都唔錯，佢經常寫Blog，分享生活及工作上嘅點點滴滴，有傳媒問佢有冇興趣出書做埋才女？佢話都有打算，但目前都係專心工作，到取得一定成績後，至想下一步嘅發展，證明潤熙除咗有身材仲好有頭腦，唔會急功近利，咁完美嘅靚女認真難得。相信大家都好想知道潤熙依家有冇男朋友？有網友翻閱過佢每篇博客，發現佢甚少同異性單獨約會，估計潤熙仲係單身。其實粉絲當佢係夢中情人，自然有咁嘅諗法，但答案只有潤熙至知喇！

陳潤熙Profile　

出生地：湖南永州　

三圍：33-26-35　

身高：168cm　

興趣：唱歌、寫Blog