世界波：倫敦Erotica情色展覽　無性不歡

每年11月喺英國倫敦舉行嘅Erotica，係歐洲其中一個最有名嘅成人情色展覽，每年都吸引幾千人入場參觀。展覽中除咗有各式各樣嘅色情表演之外，更有最新、最潮嘅性用品發售。主辦單位更聲稱參加者可以藉住呢個活動，提高與伴侶間嘅閨房情趣，重燃內心嘅原始慾望。呢個Erotica展覽，有好多唔同嘅攤檔，販賣各式各樣同性有關嘅商品，包括時尚緊身內衣、SM玩意鞋、情色藝術攝影、雕塑、性用品、性遊戲、書籍及色情DVD等，包羅萬有，令每位入場人士都能夠體驗到無性不歡嘅生活態度。

情色歌舞唔低俗

呢個情色展覽不經不覺已經舉辦咗15屆，自1997年開始便成為倫敦成人界每年一度嘅盛事。每次展覽都會邀請來自世界各地嘅情色藝術表演者參與，當中尤以華麗嘅大型色情歌舞表演最受歡迎，佢哋嘅歌舞編排令人熱血沸騰，卻冇半點低俗感覺，跟一般嘅真人騷表演絕對唔同，能夠將色情表演昇華至藝術嘅層次。

高難度鋼管舞

除咗情色藝術之外，SM表演、肚皮舞同埋令人瞠目結舌嘅高難度鋼管舞亦引人入勝。其中被安排喺會場中央表演嘅高難度鋼管舞，每年主辦單位都會邀請年度人氣最勁嘅鋼管舞一姐到場表演，好似2011年嘅Hamish McCann就係現時英國鋼管舞界中嘅響噹噹人物，佢舞技超群，謀殺咗現場唔少菲林，仲有好多人話佢嘅表演太火辣，令人睇完之後好想即刻將女伴拉埋一邊就地正法。

情婦學校 即場收生

近年喺倫敦成人界好有爭議性嘅Josephine亦有喺 Erotica 擺檔，因為佢搞咗間Mistressing學校，專門教授情婦技巧，引起社會各界議論紛紛。不過你有你不滿，佢有佢收生，佢喺會場內嘅攤檔，經常人頭湧湧，有唔少人甘願畀錢報名入讀情婦學校，佢哋嘅目的未必係想做個出色嘅小三，反而係大婆想知己知彼同小三拗手瓜，惟有走去學番幾招，希望將老公搶返嚟，真係用心良苦！如果大家對呢個情色展覽有興趣，記住年尾留意吓佢哋嘅展覽詳情，過去開吓眼界都好吖！