順水推舟
原本諗住打畀Moni求救，點知就撩起佢啲傷心事，佢愈講就愈投入，將佢個變態老公嘅三人行癖好，一五一十咁講晒出嚟，講講吓仲喊起上嚟添。話一諗番起自己要喺老公面前同個陌生男人做愛，就覺得好想喊，睇嚟佢真係好需要有個傾訴對象，但可惜我自身難保，依家冇心情聽佢講性事。不過突然間我靈機一觸，既然佢老公咁不濟，都係時候嚟個了斷。於是我膽粗粗咁直接問佢：「既然你咁痛苦，點解唔離婚？係咪因為畀佢呃晒啲積蓄，再加上人老珠黃，驚老來冇伴，所以死忍？」佢聽到我一針見血嘅問題之後，就更加喊到收唔到聲。
我聽到佢嘅反應，就知自己講中晒，於是再繼續放軟聲氣：「Moni，女人死忍等於自尋死路，你依家已經有初期抑鬱徵狀，如果再係咁落去，我相信你好快就會入青山，到時就真係唔驚冇伴嘞！」Moni聽到我嘅好言相勸之後，語帶無力咁問：「咁我可以點喎！」我聽得出佢已經六神無主，任由我帶路，於是我再話：「你信唔信我先？」佢諗咗一陣：「信！」「咁就得嘞！今晚你一於做定個最貴嘅急救面膜，11點前上床瞓覺，抖足精神，聽日着到靚靚咁出嚟，記得化少少淡妝喎，8點鐘Inakaya等！」
之後，我將同樣嘅訊息Send咗畀拉丁情人，佢好開心咁話一定準時到。事情嘅發展，相信大家都已經估到。男人真係好鬼冇用，完全經唔起試煉。所以經過一晚嘅爐端燒之後，我嘅煩惱亦隨之「燒」逝，拉丁仔嘅眼神已經完全出賣咗佢，佢將自己之前所講嘅情深說話變成廢話，幸好我Barbara一早已經洞悉世情，男女之事，講係冇用嘅，做先至最實際……（待續）
Lady Barbara
某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。