骨感美人丁一純

喺模特兒界，唔一定擁有巨乳先至可以行性感，好似嚟自北京嘅丁一純，喺業界以骨感美人見稱，亦係Top Model之一，佢拍攝嘅寫真噴血度相當高，證明貧乳都可以好性感。

出道兩年嘅一純，同其他模特兒嘅成名經過差不多，最初主力拍攝少女時裝照，之後膽粗粗參加全國模特兒大賽，結果奪得最上鏡小姐及冠軍。如果以為一純攞獎後，事業會平步青雲，咁你就錯！事情啱啱相反，仲差過之前，足足大半年冇嘢做。

性感示人

點解會咁？原來大家都以為一純奪得模特兒大賽冠軍之後，身價會水漲船高，所以唔敢搵佢做嘢。雖然係咁，一純冇後悔參加比賽，佢話期間學識咗好多嘢，對模特兒行業有更深入了解，同時令佢改變心態，例如之前佢認為自己身材唔夠好，所以唔敢性感示人，但係依家佢不但唔介意，更經常拍攝性感寫真，盡情展露骨感美態，由於出嚟嘅效果相當好，因而令佢人氣急升。

曝光率高

身高有173cm嘅一純，擁有一雙修長美腿，所以就算唔賣肉，單係騷雙腿，都已經好有吸引力，加上佢表情投入，一舉手一投足都味道十足，所以佢嘅寫真轉載率非常高，網友更稱佢為骨感美人，工作因此接踵而來，忙到不得了。最近一純除咗拍攝硬照之外，仲不時擔任電視綜藝節目嘅嘉賓，令佢曝光率大增，更有製作公司打算搵佢拍電視劇同電影，可謂前途一片光明。好彩一純紅咗都冇忘本，繼續拍攝寫真畀粉絲欣賞，仲話就算要佢裸露都冇問題添！

丁一純Profile

出生地：北京

三　圍：32-23-33

身　高：173cm

興　趣：睇戲