世界波：戒掉陋習 Honey愛煞

美國著名成人雜誌，最近向1,000名男女讀者進行訪問，查吓床上邊啲事情最令人掃興，一旦伴侶犯上，就會令性趣大打折扣。結果調查發現，第一位嘅掃興事，就係伴侶喺床上拿自己跟前度作比較，往往會令伴侶十分冇癮，破壞氣氛。

雖然有部分受訪男士認為，若然女伴只係借其他男人嚟讚揚自己嘅性能力的話，佢哋都唔係太介意，但大部分男女卻認為，無論係讚係彈都會影響性趣，事關彈的話，自然深受打擊，但就算被讚，都難免會對對方嘅前度心存芥蒂，所以無論讚或彈，比較都係床上大忌，但餘下其他4項忌諱亦應小心避免，以免讓伴侶一腳踢你落床就慘情咯！

迷信專家意見

每個人嘅性生活體驗都唔一樣，不過有啲人對專家之言，會特別信賴，更甚者會將性學專家嘅意見搬字過紙，倒模照做，令性生活隨時變成教科書。若然對方有相同見解都還好，否則只會愈做愈冇癮。其實最好嘅性生活導師，就係身邊嘅伴侶，要提高性生活質量，只需要互相了解對方嘅心靈感受，同埋肉體需要就已經足夠。

性生活太拘謹

性格係與生俱來嘅，正所謂本性難移，如果伴侶天生就係一個好拘謹嘅人，性生活態度自然都會比較拘謹，但高質量嘅性生活係需要兩個人充分協調而來，如果唔懂得適量嘅開放，最終性生活只會變成傳宗接代，或者解決需要嘅例行公事。

突然甩袋

好多男女都經歷過安全套喺性愛途中突然脫落、破裂嘅意外，女人一定會好緊張，甚至立即暫停性事。其實凡事都會有意外發生，毋須太大驚小怪，太過緊張嘅表現，只會損害兩人之間嘅信任度，如果真係怕意外懷孕，應該喺72小時內服用事後避孕藥，不過若然你係出去同陌生人逢場作戲，就自然唔同講法啦！

依賴道具

當男女間嘅性生活出現問題，或者新鮮感不再時，好多人都會選擇利用情趣道具，或者轉換環境嚟刺激性慾，令性生活重上軌道。

尤其是男人，好多時認為色情電影或者性愛道具，可以大大增加兩人之間嘅性趣，其實對女人而言可能係錯，尤其是太過依賴道具，更加容易令女人產生反感。睇見男人面對冰冷嘅性道具都玩得咁開心，感覺一定更難受，性生活又點可能會有高質素？