世界波：兼前顧後性愛甜到漏

一首歌，即使係慢歌都好，旋律總會有高低起伏，低處令人迷醉，予人思考空間；高處激動人心，帶起情緒。其實，上床亦同寫歌一樣，要捉緊高低跌蕩嘅每一刻，咁至可以令人沉醉於甜蜜嘅性愛當中。

歐美四仔同日本三仔嘅最大分別，唔係在於膚色不同嘅男女優，亦唔係佢哋所講嘅語言，而係前者通常一埋牙就喪做到尾，後者則着重情節，再配上適當嘅對話，然後進行前戲，最後至埋牙。就係因為有呢種層次分明嘅鋪排，至可以將觀眾帶入戲內，享受自己於現實當中未必可以獲得嘅快感。

只可惜，好多人雖然從日本三仔當中學到唔少前戲技術，但卻學唔到情節鋪排，一入閘就只顧住除褲，第一時間提槍瞄準位置進攻，直至完事，對女伴缺乏調情伎倆，咁點得o架！

時刻關注

其實上床應該要慢慢來，唔好急，要明白上床嘅目的唔單止係為咗發洩慾火，仲係令彼此之間嘅距離進一步拉近！好似蠻牛咁亂衝亂撞，趕住去買六合彩咩！而為咗令房事變成樂事，令兩人感情甜蜜增長，記住要時刻關注對方嘅反應，仲要捉緊以下五大時刻：

1 熱情醞釀的一刻

正如一支紅酒入樽前，必須經多個月時間釀製，想令彼此上床嘅時候享受到激情，事先亦要有充足時間令慾望升溫。大家可以一齊共進晚餐，期間眉來眼去，手指不住往對方嘅手背、手心打圈撩動，不過千祈唔好太心急，表現到好擒青咁，以免破壞氣氛。

2 肉帛相見的一刻

感情醞釀完畢，仍未係時候解放慾望。應該慢慢地，徐徐地，幫大家逐件解除武裝，呢個時候，雙眼可以柔情對望，亦可以用欣賞嘅目光去品味對方嘅衣着，你知女人幾咁重視自己嘅打扮o架啦！肉帛相見之後，眼光亦應盡量凝視住對方嘅胴體，大部分女仔都鍾意男人欣賞其曼妙嘅身材。

3 短兵相接的一刻

家陣嘅武打電影，刀光劍影，快來快去，雖然係充滿感官刺激，但係睇到眼都花埋，如果上床係咁當然No Good，應該學6、70年代嘅武打片咁，一板一眼，一招一式慢慢來，等你嘅「武器」有充分時間膨脹，亦讓對方嘅私家重地充分濕潤，咁樣進行起來就會順利好多。

4 衝上高峰的一刻

持久力或長或短，始終有其極限，面對自己同愛人正要往高峰進發，呢個時候，最緊要緊緊捉實對方，雙眼深情凝望，似要將感情全數貫注到對方眼內一樣；而衝上高峰之後，請停頓數秒，讓對方充分感受到你嘅「硬朗」。

5 恢復理智的一刻

上床嘅時候，好多人嘅理智會被潛藏嘅獸性所支配，有時會不知不覺咁做出令對方不悅嘅事，但往往在爆發過後至發覺自己犯上錯誤。當大家恢復理智之後，最緊要係心平氣和咁拎出嚟討論，講句「對唔住，頭先肉緊得滯整親你，下次唔會o架喇。」如此溫柔台詞，係女人都嬲你唔落啦！