轉食日本菜

踏入2012年，人人都想喺新一年有新突破，我就已經率先作出大突破，喺前幾晚嘅除夕派對，我竟然冇開餐，成晚淨係同班姊妹開懷暢飲，完全冇（目及）過仔，一啲餓意都冇。以往我一定會食番個除夕大餐先至甘心，唔知係咪今年有醒悟，再加上剛剛解決咗5呎5呢件玩具，一時間覺得單身真係好正，唔想破壞咗呢份感覺。所以除夕嗰晚，我飲到差唔多就單拖返屋企，撻落床已經4點幾。

第二朝起身，雖然有啲頭赤赤，但心境好平靜。我一向都好享受呢份寧靜嘅舒適感，不過今年最唔同嘅係，1月1日嘅早餐，我只係一個人食。起身開着電視、飲杯咖啡，食件多士，一直百無聊賴到夜晚，終於的起心肝，幫塊面敷Mask做吓急救，之後再浸個泡泡浴，揀件靚衫，就出去開餐。我注定係姣婆守唔到寡，除夕冇開餐，唔通新一年都唔食咩！我一早已經約好姊妹Susi出去食壽司，事關佢話有日本仔介紹我識喎！康多哩？咁鬼新鮮，我梗係赴會啦！

去到間裝修好「骨子」嘅日本料理，一眼就見到Susi條衰婆，成個川島芳子咁款，翹實一個日本仔，又難怪佢咁冧嘅，個日本仔十足妻夫木聰咁靚仔，梗係有咁實翹到咁實啦！我再望一望隔籬，嘩！呢件仲筍喎！成個淺野忠信咁有型，我知，我知，佢已經Out咗，依家興小栗旬吖嘛！不過你哋唔好理，我一向都有獨特口味o架啦……（待續）

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。