如意狼君 之 最後的女人
自從嗰日阿Mic離開後，阿May再冇佢嘅音訊，佢以為阿Mic喺內地遇上咩意外，於是託咗好多朋友幫忙，甚至喺內地搵有勢力人士追查，但始終都係冇消息。唔情願歸唔情願，每個女人都唔願意面對被騙嘅事實，但過咗3個月，仍然冇阿Mic嘅下落，阿May終於開始相信，佢真係畀人呃咗。
對佢嚟講，金錢損失仲係其次，再次埋門脫腳嘅失落，對佢嘅傷害更深，佢開始唔願意再相信男人，終日將自己鎖喺屋企，開始做宅女，更開始玩網上情緣，但只限於網上談情說性，絕對唔會出嚟見面，因為佢唔想再受騙。
再次出現
又過咗半年，當阿May差唔多忘記之前嘅傷痛，阿Mic又突然出現，佢E-mail咗一段情慾片段畀阿May，片段中嘅兩位主角，當然就係阿May同佢，仲有阿May畀佢搞到高潮迭起、全身酥軟嘅樣。阿May收到後，恍如當頭棒喝般，往事一切都浮現喺腦海，呢個時候佢先至醒悟，阿Mic其實係早有預謀嘅情場騙子，佢呃完第一筆錢之後，依家係第二筆，之後仲會有第三、第四次，一定會沒完沒了。
繩之於法
佢諗咗好耐，終於鼓起最大嘅勇氣，向好友求助，好友立即建議佢報警，雖然佢萬二分唔願意，但最終都係作出咗正確嘅決定。
警方很快就聯同內地公安，搵出呢位情場騙子，並喺佢屋企搜出所有情慾影片，當中涉及嘅女性，至少都有5至6名，而阿May就係最後一個，亦係唯一一個肯報警嘅受害人。雖然阿May做唔成佢最後嘅女人，但竟然做咗佢最後嘅受害人，真係夠晒諷刺！（完）