千年道行一晚喪

我在自己的浴室內浸泡泡浴，一邊浸，一邊諗起件5呎5，依然甜在心頭，好耐未遇過咁好嘅對手，令我有啲意猶未盡。可惜我係一個愛自由嘅女人，少少意猶未盡仍然未能夠打動我，就當係一場美好回憶啦！

好快，我就將佢拋諸腦後，進入夢鄉之中。第二朝精神奕奕咁返工，遇見任何人都送上甜美笑容，連Macy都以為我鬼上身，立即走埋嚟想夾我中指。「撞鬼你呀，做咩咁好笑容，我識你咁耐都未見過。你死喇！你係咪墮入愛河？」佢呢句說話，立即好似成盆冷水淋落嚟咁！我心諗，係喎！女人突然間春風滿面，係墮入愛河嘅迹象，莫非我今次真係中招？

我一面諗，一面返埋位，Richard見我心神不定，好心慰問一下，我竟然唔識得回應，呢次真係出事喇！我努力整理自己嘅思緒，工作時工作，做愛時做愛，工作時候千祈唔好諗性伴侶，我就係咁樣強迫自己唔再諗。好辛苦先捱到放工，離開公司冇耐，腦海就立刻浮現出5呎5副架生，我覺得自己真係太淫蕩，晚飯都未食，就已經思淫慾，真係唔要得！

我買咗一個沙律返屋企慢慢享用，今晚決定邊度都唔去，乜嘢都唔諗，實行齋戒沐浴。唔知係咪姣婆天性使然，我食完個沙律，睇埋套《法妻》之後，個腦又開始亂諗嘢，我開始有啲驚，我Barbara冇理由道行咁低，一件5呎5就搞到我失魂落魄。都係早啲上床穩陣，一覺瞓醒又係新嘅一日，於是我強迫自己瞓覺，但世事就係永遠喜歡同你作對……（待續）

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。